क्वीटो । इक्वेडरका ‘मोस्ट वान्टेड’ अपराधी तथा ‘लस छोनेरोस’ आपराधिक गिरोहका नेता होसे एडोल्फो मासियास बुधबार पक्राउ परेका छन् । ‘फिटो’ नामले चर्चित मासियास पक्राउ परेको राष्ट्रपति डानिएल नोबोआले पुष्टि गरेका हुन्।

मासियास सन् २०२४ को जनवरीमा गुआयाक्विलस्थित कारागारबाट फरार भएका थिए। उनी हत्या र लागुपदार्थ तस्करी अभियोगमा ३४ वर्षको जेल सजाय भोगिरहेका थिए।

उनी फरार भएपछि इक्वेडरमा हिंसाको लहर फैलिएको थियो, जसका कारण राष्ट्रपति नोबोआले देशमा आन्तरिक सशस्त्र द्वन्द्वको घोषणा गरे। उनले ‘लस छोनेरोस’ सहित देशभर सक्रिय २१ आपराधिक गिरोहहरूलाई आतङ्ककारी समूहको रूपमा सूचीकृत गरेका थिए।

सन् २०२४ को फेब्रुअरीमा अमेरिकी डिपार्टमेन्ट अफ ट्रेजरीले लागुपदार्थ तस्करी र हिंसात्मक गतिविधिमा संलग्न भएको आरोपमा मासियास र लस छोनेरोस समूहमाथि प्रतिबन्ध लगाएको थियो।

राष्ट्रपति नोबोआका अनुसार इक्वेडर अहिले मासियासलाई अमेरिका प्रत्यर्पण गर्न कार्यरत छ र अमेरिकी अधिकारीहरूको जवाफको प्रतीक्षामा छ।