विराटनगर । तरकारी लोड गरिएको ट्रकबाट ठूलो परिमाणमा गाँजा बरामद भएको छ । जिल्ला प्रहरी कार्यालय सुनसरीका अनुसार सोमबार र मंंगलबार गरी ४ हजार २ सय ३० किलो गाँजा बरामद भएको हो । प्रहरीले धनकुटाबाट तरकारी लोड गरी आउँदै गरेका दुई वटा ट्रक र ३ जना भरियालाई पनि नियन्त्रणमा लिएको छ । मंगलबार बिहान इटहरी उपमहानगरपालिका– २० तरहरामा ५ ख ६११६ नम्बरको तरकारी लोड गरिउको ट्रकमा ७० वटा बोरामा गाँजा बरामद भएको हो ।
इलाका प्रहरी कार्यालय इटहरीको टोलीले बन्दा र आलुसहित ल्याउँदै गरेको अवस्थामा २ हजार १ सय किलो गाँजा बरामद गरेको हो । प्रहरीका अनुसार ७० बोरा गाँजा लोड गरिएको ट्रकमा ४८ बोरा कोपी र १२ बोरा आलु पनि थियो । मंगलबार बिहान ट्रक नियन्त्रणमा लिएको प्रहरीले चालक धनकुटा शहिदभूमि गाउँपालिका– ६ का राजेन्द्र राईसहित सोही स्थानका सुनिल राई र बराहक्षेत्र नगरपालिका –९ सुनसरीका सुमन राईलाई पनि नियन्त्रणमा लिएको छ ।
सोमबार धरान उपमहानगरपालिका– १३ शिवधाराबाट धनकुटाबाट अदुवा र बन्दा लिएर आउदै गरेको प्रदेश १–०२–००२ ख ०८४८ नम्बरको ट्रकमा पनि ७० बोरा गाँजा बरामद भएको थियो । सो ट्रकमा ३१ बोरा अदुवा र ६ बोरा बन्दा थियो । बरामद भएको गाँजाको तौल २ हजार १ सय ३० किलो छ । धनकुटा गाँजा खेती हुने क्षेत्र हो । धनकुटामा उत्पादन भएको गाँजा भारत निकासीका लागि तस्करको समूहले साना गाडी र ट्यु मार्फत सप्तकोशी नदी हुँदै ओसार पसार गर्थे । पछिल्लो समय तरकारी बोकेको ट्रक प्रयोग हुन थालेको प्रहरीले बताएको छ ।
