वीरगंज । श्रुति साह । सशस्त्र प्रहरी बल नेपाल, प्र.सी.सु. गुल्म वीरगंज र वीरगंज भन्सार कार्यालयको संयुक्त टोलीले भारतबाट भन्सार छली गरी ल्याइएको ठूलो परिमाणको तयारी कपडा नियन्त्रणमा लिई भन्सारमा दाखिला गराएको छ। विशेष सूचनाको आधारमा गरिएको कारबाहीमा झण्डै २२ लाख ७१ हजार ९५० रुपैयाँ बराबरको कपडा बरामद गरिएको हो।

वीरगंज महानगरपालिका–६, रेशमकोटीस्थित २ नम्बर रोडमा रहेको रमेश अग्रवालको दुईतले पक्की घरको ग्राउण्ड फ्लोरमा सञ्चालनमा रहेको जी.के. ट्रेडर्सको गोदाममा तयारी कपडा लुकाएर राखिएको अवस्थामा भेटिएको हो। उक्त गोदाममा भाडामा लिइएका दुईवटा कोठामा भारतबाट अवैध रूपमा भित्र्याइएका भेष्ट, जिन्सको पाइन्ट, टिसर्ट लगायतका कपडा लुकाइएका थिए।

सशस्त्र प्रहरी बल र भन्सार कार्यालयको संयुक्त टोलीले ती सामानहरू बरामद गरी आवश्यक प्रक्रिया पूरा गरेर वीरगंज भन्सार कार्यालयमा बुझाएको सशस्त्र प्रहरी नायव उपरीक्षक तथा सूचना अधिकारी देबेन्द्र बहादुर सिंहले जानकारी दिनुभयो।

यो कारबाहीले सीमा क्षेत्रमा भन्सार छलिरहेको गिरोहहरूको निगरानी कडाइ भइरहेको सन्देश दिएको छ। सुरक्षा निकायका अनुसार यस्ता गतिविधिमा संलग्न व्यक्तिहरूको खोजी तथा थप अनुसन्धान जारी छ।