चितवन ।शिकिन्द्र साह । चितवनको भरतपुरमा आज बिहान नारायणी नदी किनारमा एक विशेष योग कार्यक्रम सम्पन्न भएको छ, जसले न केवल शारीरिक र मानसिक स्वास्थ्यप्रति जनचेतना फैलायो, तर नेपाल–भारत मैत्री सम्बन्धलाई समेत गहिर्याएको छ। भारतको महावाणिज्य दूतावास, बीरगंज (नेपाल) द्वारा आयोजना गरिएको उक्त कार्यक्रममा नेपालका सुरक्षा निकाय, राजनीतिक नेतृत्व, नागरिक समाज, योग संस्था र सर्वसाधारणको उल्लेखनीय सहभागिता देखियो।

अन्तर्राष्ट्रिय योग दिवसका ११ औं संस्करणलाई “एक पृथ्वी, एक स्वास्थ्यको लागि योग” भन्ने नाराले निर्देशित गर्दै कार्यक्रम सुरु भएको थियो। भरतपुर महानगरपालिकाका उपमेयर श्री चित्रसेन अधिकारीज्यू र चितवनका प्रहरी उपरीक्षक श्री गोविन्द पुरीज्यूको विशेष उपस्थिति कार्यक्रममा रह्यो। उनीहरूले योगको महत्व मात्र होइन, नेपाल–भारत सम्बन्धमा यस्तो कार्यक्रमको भूमिका समेत स्पष्ट रूपमा उल्लेख गरे।

कार्यक्रममा भारतका महावाणिज्यदूत श्री देवी सहाय मीणाले योगलाई एक सार्वभौम अभ्यासका रूपमा प्रस्तुत गर्दै यसको वैश्विक स्वीकार्यता र प्रभावबारे प्रकाश पार्नुभयो। उहाँले अन्तर्राष्ट्रिय योग दिवस कसरी २०१५ देखि संयुक्त राष्ट्रसंघमार्फत मनाउन थालिएको हो भन्ने ऐतिहासिक पृष्ठभूमिसमेत सहभागीहरूलाई स्मरण गराउनुभयो।

उपमेयर अधिकारीले योगलाई एक साझा अभ्यासको रूपमा लिएर दुई देशबीचको सम्बन्धलाई नयाँ उचाइमा पु¥याउने अभिव्यक्ति दिनुभयो। उहाँले भरतपुरमा योगको लोकप्रियता बढाउने दिशामा महानगरको प्रयासबारे पनि जानकारी दिनुभयो।

सुरक्षा निकाय, सरकारी अधिकारी, योग प्रशिक्षक तथा सर्वसाधारणको एकै ठाउँमा जुटेर योग अभ्यास गर्नु यस कार्यक्रमको विशेषता रह्यो। कार्यक्रमले जनस्वास्थ्य, आत्मचेतना र पारस्परिक सहकार्यलाई एकै साथ प्रवर्द्धन गरेको आयोजकहरूले जनाएका छन्।

यस योग समारोहले भरतपुरलाई स्वस्थ जीवनशैलीको अभियानमा एक सशक्त सन्देश दिएको छ भने अन्तर्राष्ट्रिय योग दिवसको वैश्विक महत्वलाई स्थानीय स्तरमा महसुस गराएको छ।