वीरगञ्ज । वीरगञ्ज महानगरपालिका–४ मा रहेको त्रिभुवन विश्वविद्यालय चिकित्सा शास्त्र अध्ययन संस्थान अन्तर्गतको वीरगञ्ज नर्सिङ क्याम्पसमा निरीक्षण गरिएको छ। निरीक्षणका क्रममा क्याम्पसमा रहेको खानेपानीको समस्याबारे गम्भीर छलफल गरिएको छ।

हाल सञ्चालनमा रहेको खानेपानी ट्याङ्की जीर्ण भइसकेको र पानी चुहिने स्थिति रहेको पाइएकोले ट्याङ्कीको शीघ्र मर्मत तथा आवश्यक परे नयाँ ट्याङ्की निर्माण गरिने प्रतिबद्धता व्यक्त गरिएको छ।

त्यस्तै, क्याम्पस परिसरभित्र खुला नालाबाट विर्ता बस्तीको फोहोर पानी सिधै क्याम्पसमा प्रवाह भई वातावरण अत्यन्तै प्रदूषित भएको गुनासो आएको छ। यस समस्यालाई मध्यनजर गर्दै नालाको सरसफाइ, व्यवस्थित ढल निकास र दिर्घकालीन समाधानका लागि सम्बन्धित निकायलाई तत्काल कदम चाल्न निर्देशन दिइएको छ।

“नर्सिङ क्याम्पस अध्ययन, अध्यापन तथा स्वास्थ्य सेवा प्रदान गर्ने महत्वपूर्ण संस्था हो। यसको वातावरणलाई स्वच्छ, सुरक्षित र व्यवस्थित बनाउन सबैको सहयोग आवश्यक छ,” निरीक्षणपछि भनिएको छ।

शैक्षिक तथा स्वास्थ्य सेवाको गुणस्तर वृद्धि गर्दै समृद्ध वातावरण निर्माणतर्फ अगाडि बढ्ने विश्वास व्यक्त गरिएको छ।