वीरगञ्ज । पर्सा जिल्ला प्रहरी कार्यालय र जिल्ला ट्राफिक प्रहरी कार्यालय पर्साको संयुक्त आयोजनामा सञ्चालन भइरहेको ट्राफिक सप्ताह २०८२ को चौथो दिन आइतबार वीरगञ्जमा विभिन्न जनचेतनामूलक कार्यक्रमहरू सम्पन्न भएका छन्।
कार्यक्रमको उद्देश्य नागरिकमा सडक सुरक्षाबारे चेतना फैलाउने रहेको आयोजकले जनाएका छन्। यस अन्तर्गत निशुल्क आँखा जाँच सिविर, ट्राफिक सचेतना पर्चा तथा स्टिकर वितरण, सडक प्रयोगकर्तालाई व्यावहारिक ज्ञानजस्ता गतिविधि सञ्चालन गरिएको थियो।
जिल्ला ट्राफिक प्रहरी कार्यालय पर्साका प्रमुख प्रहरी निरीक्षक लोकराज भट्टको नेतृत्वमा कार्यक्रम सञ्चालन गरिएको हो। निरीक्षक भट्टले नागरिकको सक्रिय सहभागिता र सहकार्यबिना सुरक्षित यातायात प्रणालीको परिकल्पना गर्न नसकिने बताए। उनले भने, “ट्राफिक सप्ताहलाई हामी नागरिक सहभागिता वृद्धि गर्ने अवसरका रूपमा लिएका छौँ।”
नयाँ बसपार्क क्षेत्रमा आयोजित आँखा जाँच सिविरमा वीरगञ्ज सामुदायिक आँखा अस्पतालले प्राविधिक सहयोग पुर्याएको थियो। सवारी चालक, सहचालकलगायत १०७ जनाले आँखा परीक्षण गराएका थिए।
कार्यक्रममा बिर्ता वडा प्रहरी कार्यालयका प्रमुख निरोज चौलागाईं, ट्राफिक प्रहरीका गुणनिधि खकुरेल, श्रीपुर प्रहरी चौकीका प्रमुख, समाजसेवी दिलीप कार्की, वडा नं. ४ का अध्यक्ष जगत साह कानु, प्रभु अस्पतालका कर्मचारी, पत्रकार अभिलाष गुप्ता र दीपक चौरसियालगायतको उपस्थिति रहेको थियो।
यसै क्रममा, साउथजोन मावि र एन्जल वर्ल्ड स्कूलका विद्यार्थीहरूको पनि उल्लेख्य सहभागिता देखिएको थियो। उनीहरूले व्यस्त चोकहरूमा खटिएर पैदल यात्रुहरूलाई जेब्रा क्रसिङ प्रयोग गर्न, सही दिशा र सडक पेटीबाट हिँड्न प्रेरित गरे।
विद्यार्थीहरूले ट्राफिक सचेतनामूलक पर्चा वितरण गर्नुका साथै ट्राफिक शिष्टाचारसम्बन्धी जानकारीसमेत सार्वजनिक स्थानमा प्रवाह गरेका थिए।
कार्यक्रम आयोजकहरूले जनमुखी र व्यवहारमैत्री यस्ता अभियानले ट्राफिक नियमप्रति नागरिकको चेतना अभिवृद्धि गर्ने र सडक दुर्घटना न्यूनीकरणमा महत्वपूर्ण भूमिका खेल्ने विश्वास व्यक्त गरेका छन्। ट्राफिक सप्ताहका बाँकी दिनहरूमा पनि यस्ता कार्यक्रम जारी राखिने जानकारी दिइएको छ।
