वीरगञ्ज | वीरगञ्ज उद्योग वाणिज्य सङ्घका अध्यक्ष तथा पदाधिकारीहरूसँग क्रियाशील युवा पत्रकार मंच नेपालले एक विशेष भेटघाट तथा स्वागत कार्यक्रम सम्पन्न गरेको छ। कार्यक्रम वीरगञ्ज उद्योग वाणिज्य सङ्घको कार्यकक्षमा आयोजना गरिएको हो।

भेटघाटका क्रममा सङ्घका अध्यक्ष श्री हरिप्रसाद गौतमले उद्योग वाणिज्य सङ्घ र क्रियाशील युवा पत्रकार मंचबीच आगामी दिनमा सामाजिक, आर्थिक तथा विकासमूलक गतिविधिमा सहकार्य गर्दै अघि बढ्ने प्रतिबद्धता जनाउनुभयो।

कार्यक्रममा सङ्घका वरिष्ठ उपाध्यक्ष श्री माधव राजपाल, उपाध्यक्ष श्री आशिषकुमार लाठ, महासचिव श्री शिवजीप्रसाद साह, कोषाध्यक्ष श्री अनोज रुँगटा, कार्यसमिति सदस्यहरू श्री दिपककुमार टिवडेवाल र श्री हेमन्त बैद्यको उपस्थिति रहेको थियो।

त्यसैगरी, कार्यक्रममा क्रियाशील युवा पत्रकार मंच पर्साका अध्यक्ष श्री प्रणयकुमारसहित मंचका पदाधिकारी र कार्यसमिति सदस्यहरूको उल्लेखनीय सहभागिता रह्यो।

कार्यक्रमले उद्योग वाणिज्य क्षेत्र र पत्रकारिता क्षेत्रबीच पारस्परिक सहयोग तथा समन्वयलाई थप मजबुत बनाउने विश्वास व्यक्त गरिएको छ।