वीरगंज | लालबाबु सिंह | वीरगंजस्थित संस्कार संस्थाले निर्जला एकादशीको पावन अवसरमा शनिबार विशेष सामाजिक सेवा कार्यक्रम अन्तर्गत ३ हजारभन्दा बढी व्यक्तिलाई नि:शुल्क निम्बु सर्बत वितरण गरेको छ।

शहरको राणीसती मन्दिर अगाडि आयोजित उक्त सेवामा यात्रु, पर्यटक, रिक्सा चालक, सवारी चालक तथा अन्य सर्वसाधारणलाई चिसो निम्बु सर्बत वितरण गर्दै गर्मीबाट राहत दिने प्रयास गरिएको थियो।

संस्थाका सदस्य सोनी अग्रवालका अनुसार, निर्जला एकादशी वर्षकै सबैभन्दा ठूलो एकादशी भएकाले यस दिन गरिने सेवा र पुण्यको विशेष महत्त्व रहन्छ। बिहान ११ बजेबाट सुरु भएको सर्बत वितरण दिउँसो ३ बजे सम्म चल्यो, जसअन्तर्गत ३ हजारभन्दा बढीलाई सेवा प्रदान गरिएको जानकारी दिइएको छ।
संस्थाकी अध्यक्ष रेणु अग्रवालले यस अवसरमा बताइन्, “जेठ महिना वर्षकै सबैभन्दा गर्मी हुने समय भएकाले निर्जला एकादशीको धार्मिक अवसरलाई सामाजिक सेवासँग जोड्दै यो कार्यक्रम गरिएको हो। दिन-दुखी, असहाय, रिक्सा चालकदेखि पर्यटकहरूसम्म सेवा गर्न पाउँदा हामी निकै खुसी छौं। यही हाम्रो संस्थाको उद्देश्य हो।”

संस्कार संस्थाले विभिन्न धार्मिक पर्व तथा अवसरहरूमा फलफूल, सतुवा, सर्बत लगायतका सामग्री वितरण गर्दै समाजसेवामा सक्रिय भूमिका निभाउँदै आएको बताइएको छ। परम्परा, धर्म, संस्कार र सामाजिक एकताको प्रवर्द्धन संस्थाको मुख्य उद्देश्य रहेको जनाइएको छ।
कार्यक्रममा जुली तुलस्यान, मिनाक्षी तुलस्यान, शशी अग्रवाल, पुनम बन्का, शशी रुङटा, देवकी चाचान, सुनिता साह, प्रीती खेतान लगायत सहयोगी सदस्यहरूको सक्रिय सहभागिता रहेको थियो|

संस्थाले भविष्यमा यस्ता कार्यक्रमहरू अझ व्यापक रूपमा सञ्चालन गर्दै जाने प्रतिबद्धता पनि जनाएको छ।