बीरगञ्ज | नेपाल आर्थिक पत्रकार संघ (नाफिज) को आयोजनामा तथा बीरगञ्ज उद्योग वाणिज्य सङ्घको सह–आयोजनामा “नेपाल इन्टरमोडल यातायात विकास समिति” को संचार रणनीति विषयक छलफल तथा अन्तर्क्रिया कार्यक्रम बीरगञ्ज उद्योग वाणिज्य सङ्घको सभाहलमा सम्पन्न भएको छ।
कार्यक्रममा बीरगञ्ज उद्योग वाणिज्य सङ्घका कार्यवाहक अध्यक्ष श्री माधव राजपालज्यूले इन्टरमोडल विकास समितिले अपनाउनुपर्ने संचार रणनीतिका विविध पक्षहरूबारे महत्वपूर्ण धारणा व्यक्त गर्नुभयो। उहाँले पारदर्शिता, समन्वय, तथा सूचना प्रवाहलाई सशक्त बनाउन समितिले स्पष्ट रणनीति तय गर्नुपर्नेमा जोड दिनुभयो।
छलफल कार्यक्रममा विभिन्न सरकारी निकायका प्रतिनिधिहरूको उल्लेखनीय सहभागिता रहेको थियो। जिल्ला प्रशासन कार्यालयका सहायक प्रमुख जिल्ला अधिकारी श्री सुमनकुमार कार्की, बीरगञ्ज सुक्खा बन्दरगाहका प्रमुख भन्सार अधिकृत श्री धनबहादुर बडुवाल, जिल्ला प्रहरी कार्यालय पर्साका प्रहरी उपरीक्षक श्री गौतम मिश्र, तथा सशस्त्र प्रहरी बल पर्साका प्रहरी उपरीक्षक श्री राधेश्याम धिमालले आ-आफ्ना धारणा प्रस्तुत गर्दै संचार रणनीतिमा सम्बन्धित निकायबीचको समन्वय अपरिहार्य रहेको बताए।
नेपाल आर्थिक पत्रकार संघका निवर्तमान अध्यक्ष श्री मोदनाथ ढकाल, महासचिव श्री शिवजीप्रसाद शाह, कोषाध्यक्ष श्री अनुज रुंगटा, TRS Himalaya Logicpark का सि.ई.ओ श्री गणेश घिमिरे, महाप्रबन्धक श्री सुवास सुवेदी, तथा प्रिस्टिन भेलीका अतुल शर्मा र विकाश शर्मा लगायत उद्योगी–व्यवसायी तथा नेपाल इन्टरमोडलका प्रतिनिधिहरूको पनि कार्यक्रममा सक्रिय उपस्थिति रहेको थियो।
कार्यक्रममा सहभागीहरूले सञ्चार रणनीतिले नीति निर्माणमा पार्ने प्रभाव, निजी–सरकारी सहकार्यका चुनौतीहरू, र सूचना व्यवस्थापन प्रणालीको आवश्यकताबारे गहिरो छलफल गरेका थिए।
यो कार्यक्रमले नेपाल इन्टरमोडल यातायात विकास समितिको संचार रणनीति थप स्पष्ट र प्रभावकारी बनाउन सहयोग पुग्ने विश्वास व्यक्त गरिएको छ।
