पर्सा । सशस्त्र प्रहरी बल नेपाल विभिन्न बी.ओ.पी. बाट खटिएको टोलीले भारतबाट अवैध रूपमा भन्सार छलि ल्याउँदै गरेको १३,८०,९६० रुपैयाँ बराबरको विभिन्न सामान नियन्त्रणमा लिई वीरगञ्ज भन्सार कार्यालयमा बुझाएको छ।
मिति २०८२ साल जेठ १६ गते बीरगंज महानगरपालिका–२५ स्थित चण्डालचोकबाट प्रदेश २–०३–००१ स ४२६४ नम्बरको ई–रिक्सामा लोड गरि ल्याइएको करिब २,७०,००० रुपैयाँ बराबरको मोटर पार्ट्स र २,००,००० रुपैयाँ बराबरको ई–रिक्सा नियन्त्रणमा लिई भन्सार कार्यालयमा बुझाइएको सशस्त्र प्रहरीले जनाएको छ।
त्यसैगरी, विशेष सूचनाका आधारमा बीरगंज म.न.पा.–१६ स्थित नगवा गाउँको डम्पिङ साइटमा सशस्त्र प्रहरी प्र.सी.सु.गुल्म बीरगंजबाट खटिएको टोलीले भारतबाट अवैध रूपमा ल्याइएका मोबाइल पार्ट्स, फुटबल सुज, लेडिज तथा जेन्ट्स सुज लगायत ८,३६,९५० रुपैयाँ बराबरका सामान चारवटा साइकलमा लोड गरि ल्याइँदै गरेको अवस्थामा नियन्त्रणमा लिई भन्सार कार्यालयमा बुझाएको छ।
यसै क्रममा भगुवा तथा नगवा क्षेत्रबाट ७३,८०० रुपैयाँ बराबरका कपडा र किराना सामग्री समेत नियन्त्रणमा लिई आवश्यक कारबाहीका लागि भन्सार कार्यालय पर्सामा बुझाइएको छ।
