वीरगन्ज । कृष्ण श्रीवास्तव । वीरगञ्ज महानगरपालिका वडा नम्बर २ छपकैयाँस्थित रेल्वेरोडसँगै जोडिएको करिब ३२ कट्ठा जग्गामा बी.पी. कोइराला उद्यान अन्तर्गतको अस्थायी बजार (हाटबजार) सार्ने तयारी अन्तिम चरणमा पुगेको छ। वीरगञ्ज महानगरपालिकाले हाल शहरको विभिन्न भागमा अनियमित रूपमा सञ्चालन भइरहेका फाटफुट बजारलाई व्यवस्थापन गर्दै व्यवस्थित र सुरक्षित स्थानमा सार्ने योजना अनुसार यो कार्य अघि बढाइएको हो।

महानगरले रेल्वे ट्र्याक नजिकै रहेको यो जग्गालाई सार्वजनिक प्रयोगका लागि तयारी गर्दै हाटबजारका लागि पूर्वाधार निर्माणको कार्य तीव्र रुपमा अगाडि बढाएको छ। अहिले आवश्यक संरचना निर्माण, बजार स्टलको व्यवस्थापन, सडक पहुँच र पार्किङ व्यवस्थापनलगायतका कामहरू अन्तिम चरणमा पुगेको वीरगञ्ज महानगर प्रमुख राजेशमान सिंहले जानकारी दिएका छन्।

उनका अनुसार, “यो स्थानमा १५० बढी व्यवसायीहरूलाई स्थान दिने गरी योजना बनाइएको छ। बजार पूर्णरूपमा सञ्चालनमा आएपछि हाल अव्यवस्थित रूपमा सडक किनार, चोक तथा विभिन्न ठाउँमा व्यापार गर्दै आएका साना व्यापारीलाई यहीँ सारिनेछ।”

महानगरले यस स्थानमा सरसफाइ, सुरक्षाका उपाय, पक्की गोदाम, शौचालय, पानीको व्यवस्था लगायतका पूर्वाधार समेत निर्माण गरिरहेको छ। स्थानीय बासिन्दा र व्यापारीहरूले पनि यस निर्णयको स्वागत गरेका छन्। उनीहरूले व्यवस्थित हाटबजार सञ्चालनमा आएपछि व्यवसाय सञ्चालनमा सहजता आउने र ट्राफिक जामको समस्या पनि कम हुने विश्वास व्यक्त गरेका छन्।

सार्वजनिक सेवाको पहुँच विस्तार र नगर क्षेत्रलाई व्यवस्थित बनाउनका लागि वीरगञ्ज महानगरपालिका निरन्तर क्रियाशील रहेको जनाउँदै महानगर प्रमुखले यो प्रयास बजार व्यवस्थापनको दिशामा एक महत्वपूर्ण कदम हुने बताएका छन्। अब केही दिनभित्रै बजार सार्ने प्रक्रिया सुरु हुने बताइएको छ।