वीरगन्ज । राष्ट्रिय स्वतन्त्र पार्टी (रास्वपा) का सांसद शिव नेपालीले सुशासन व्यवस्था प्रतिशोधमा आधारित हो भनेर प्रश्न गरेका छन्।
बिहीबार (आज) जारी संसद् बैठकमा विनियोजन विधेयकका सिद्धान्त र प्राथमिकतामाथि बोल्दै नेपालीले यस्तो बताएका हुन्।
‘कुलमान घिसिङको नेतृत्वमा देश लोडसेडिङमुक्त भयो। जनताको वास्तविक समस्या बुझेर समाधान गर्ने यस्ता व्यक्ति जुनसुकै सरकार आए पनि देशको हितमा प्रयोग गर्न सक्ने क्षमता राख्नुपर्ने होइन र ? तर, यिनै व्यक्तिहरूलाई राजनीतिक चलखेल गरेर किन निरन्तर पाखा लगाइन्छ ?,’ उनले सोधे।
यस्तै उनले पार्टी सभापति रवि लामिछानेमाथि सरकारले प्रतिशोध साँधेको दोहोर्याए।
‘चौथो दलका सभापति, जसले जनताको हितमा खह्रो आवाज उठाउँदै सत्य विषयहरू प्रष्ट रूपमा सार्वजनिक गरिरहनुभयो, उहाँमाथि सरकारले प्रतिशोधको व्यवहार देखाएर एक हिसाबले सुशासनलाई प्रश्न चिह्नमा राखेको छ। यदि शासन व्यवस्था प्रतिशोधमा आधारित हुन्छ भने त्यो प्रजातान्त्रिक व्यवस्थाको गम्भीर अपमान हो। यी विषयहरूलाई गम्भीरतापूर्वक छलफल हुनुपर्छ,’ उनले भने।
यस्तै नेपालीले नीतिगत भ्रष्टाचारको अन्त्य अपरिहार्य भएको बताएका छन्। शब्द नभइ कार्यदृष्टिमा परिणाम देखिनुपर्ने उल्लेख गर्दै उनले भने, ‘भाषण होइन, परिणाम दिनुपर्छ। देश र जनताको प्रतीक्षा अन्त्य गर्न नेतृत्व जिम्मेवार बन्नुपर्छ। नीतिगत भ्रष्टाचारको अन्त्य गर्न जरुरी छ। प्रत्येक वर्ष भाषणमा ठूला-ठूला अजेन्डाहरू समेटिन्छन् तर, तिनलाई कार्यान्वयनमा उतार्ने कमजोर किन हुन्छ ? कुन निकाय जिम्मेवार छ ? उत्तरदायित्वको खाका स्पष्ट छैन’ उनले भने।
