वीरगञ्ज । वीरगञ्जका एक बिरामीले स्वास्थ्य परीक्षणको क्रममा निजी अस्पतालबाट प्राप्त रिपोर्टमा लापरवाही भएको गम्भीर आरोप लगाएका छन्। बिरामीले पहिलो पटक २०८१ पुस ११ गते नेशनल मेडिकल कलेजमा परीक्षण गराउँदा करिब ५.० mm.को पथरी देखिएको थियो। 
दोस्रोपटक २०८२ वैशाख १२ गते सोही नेशनल मेडिकल कलेजमा गराइएको परीक्षणमा पथरीको आकार ५.५ mm पुगेको थियो।
तेस्रो पटक २०८२ वैशाख २२ गते गराइएको अल्ट्रासाउण्ड रिपोर्टमा पथरी ६.८ mm पुगेको देखियो। यस्तै अवस्थालाई मध्यनजर गर्दै चिकित्सकले शल्यक्रियाको सल्लाह दिएका थिए।
तर, शल्यक्रिया अगाडि अझै एक पटक सुनिश्चित गर्नुपर्ने सोचमा बिरामीले २०८२ जेठ २८ गते वीरगञ्जकै श्रीराम अस्पताल प्रा. लि.मा परीक्षण गराए। त्यहाँ डाक्टरले सामान्य प्रश्न गरे: “दुख्छ ? केही समस्या छ ?” बिरामीले जवाफ दिए: “कुनै समस्या छैन, शंका भएकाले चेक गराउन आएको हुँ।”
जाँचपश्चात श्रीराम अस्पतालले दिएको रिपोर्टमा पथरी नरहेको, अवस्था पूर्णत: सामान्य रहेको उल्लेख गरियो। रिपोर्टले बिरामीलाई अचम्ममा पार्यो। “६.८ मि.मि. को पथरी देखिएको थियो, अब अचानक कहाँ गयो?” भन्दै उनी आश्चर्यचकित भए। जब बिरामीले विगतको परीक्षणबारे जानकारी दिए, श्रीराम अस्पतालका डा. सुनिल यादव रिसाउँदै भने: “पहिले नै भन्नु पर्थ्यो नि! किन भन्नु भएन?” ती डाक्टरको व्यवहार र आवाजमा भएको रुखोपनले बिरामीलाई अझै शंका लाग्यो।
त्यसपछि उनले त्यही दिन पुनः नेशनल मेडिकल कलेजमा परीक्षण गराउँदा पथरीको आकार ६.९ mm पुगेको देखियो।
यसले श्रीराम अस्पतालको रिपोर्टप्रति गम्भीर प्रश्न उठाएको छ।
यस घटनाबाट निजी क्षेत्रको नाममा चलाइएका अस्पतालमा रिपोर्ट कागजमा मात्रै सीमित भएको, परीक्षणमा लापरवाही, अनि बिरामीको स्वास्थ्यलाई लिएर गरिएको खेलवाड झल्किन्छ। श्रीराम अस्पताल प्रा. लि. जस्ता संस्थाले स्वास्थ्यजस्तो संवेदनशील विषयमा लापरवाही गर्नु गम्भीर विषय हो, जसमा सम्बन्धित निकायले ध्यान दिन आवश्यक देखिन्छ।
