काठमाडौं। गृहमन्त्री रमेश लेखकले कोशी प्रदेश स्तरीय सुरक्षा बैठकमा खुल्ला सीमानाकाबाट हुने अवैध चोरी पैठारी नियन्त्रण गर्न सुरक्षा संयन्त्रलाई निर्देशन दिइरहे पनि मधेश प्रदेशका प्रमुख नाकाहरू सहित सुनसरी र मोरङ जिल्लाका विभिन्न सिमानाकाबाट समेत अवैध तस्करी डरलाग्दो रूपमा मौलाइरहेको छ। विशेषगरी पर्साको वीरगञ्ज नाका र बाराका विभिन्न नाकाबाट व्यापक रूपमा तस्करी भइरहेको र यसमा समेत सुरक्षाकर्मीको सेटिङ रहेको आरोप लाग्दै आएको छ।

सिमा सुरक्षा तथा राजस्व चुहावट नियन्त्रणका लागि परिचालित सशस्त्र प्रहरी बल र नेपाल प्रहरीको स्थानीय युनिटसमेतको ‘सेटिङ’मा तस्करी हुने क्रम बढेको हो। सिमावर्ती क्षेत्रबाट व्यापक रुपमा तस्करी बढेसँगै प्रादेशिक तहबाट त्यसको नियन्त्रणका लागि सशस्त्र प्रहरी बल र नेपाल प्रहरीको निकायले थप सक्रियता देखाएको दाबी गरेपनि तस्करी नियन्त्रणमा खासै कमी आएको छैन।

पछिल्लो समय सुनसरीको लौकही, घुस्की, देवानगञ्ज, कप्तानगञ्ज, साहेवगञ्ज, कोशी ब्यारेज तथा आसपासको क्षेत्र र मोरङ जिल्लाको रानी तथा आसपासमा रहेका मटेरुवा, दरैयाको उखुबारी, दक्षिणी गेटका साथै सिक्टी, मायागञ्ज, अमाही बरियादी, डोरिया लगायतका नाकाबाट सशस्त्र प्रहरी र नेपाल प्रहरीको युनिटकै समन्वयमा तस्करी भइरहेको खुलेको छ। त्यसैगरी, पर्साको वीरगञ्ज नाका र बाराका विभिन्न नाकाहरूबाट पनि संगठित रूपमा कपडा, इलेक्ट्रोनिक्स, मोटर पार्टस्, खाद्यान्न लगायतका सामानहरूको व्यापक तस्करी हुने गरेको र यसमा पनि स्थानीय सुरक्षाकर्मीहरूसँगको मिलोमतो रहेको स्रोतले दाबी गरेको छ।

मोरङको विभिन्न नाकाबाट कपडाजन्य तथा उपभोग्य सामान, रजनीगन्धा, गुट्का लगायतका विविध सुर्तीजन्य सामग्री, खसी, राँगाको हड्डी तथा छाला, तारको झोला लगायतका विभिन्न सामानको अवैध तस्करीमा संलग्न अफ्ताब, सबनम, सोनी, मुन्नी, अंगुरी, विशाखा, तबरेज, गुड्डु लगायतका व्यापारीहरुसँग स्थानीय युनिटपतिहरुदेखि जिल्ला तहका अन्य अधिकृतहरुसमेतको सेटिङ रहेको स्थानीय व्यापारीहरुको भनाइ छ।

सुनसरीको सिमानाकामा व्यापक कडाइ गरिएको दाबी गरिए पनि देवानगञ्ज, कप्तानगञ्ज र साहेबगञ्ज नाका भने सिमा क्षेत्रमै परिचालित सुरक्षाकर्मीसमेतकै संरक्षणमा तस्करीको केन्द्र बनेको बुझिएको छ। विभिन्न कपडाजन्य, सुर्तीजन्यलगायत मल, प्याज, चिनी, मोबाइल, गुटखा, किराना सामान र दैनिक उपभोग्य सामग्री तस्करी हुने क्रम रोकिएको छैन।

गृह मन्त्रालयले सादा पोशाकमा सुरक्षाकर्मी परिचालन गर्न नपाउने नीति अगाडि बढाए पनि यस क्षेत्रमा (सुनसरी, मोरङ, पर्सा र बारा लगायत) नेपाल प्रहरी र सशस्त्र प्रहरी बलले सादा पोशाकमा अधिकृत तहसमेतका सुरक्षाकर्मी परिचालन गरेर तस्करीमा संलग्न व्यवसायीहरुसँग समन्वय गर्ने गरेको दाबी व्यवसायीहरुको छ। सुनसरी, मोरङ, पर्सा तथा बाराका विभिन्न नाकाबाट नेपालतर्फ अबैध तस्करी हुने गरेको र यसमा विभिन्न निकायको समन्वय रहेको भन्ने गुनासो बढिरहेको विषयलाइ मध्यनजर गरी राजस्व अनुसन्धान कार्यालय इटहरीले रात्री गस्तीसमेत परिचालन गरिरहेको र त्यस क्रममा विभिन्न सामानहरु बरामद भइरहेको घटनाबाट पनि सिमानाकाबाट अवैध तस्करी बढ्दो रहेको तथ्यलाई पुष्टि गरेको देखिन्छ।

पछिल्लो समय सिमा क्षेत्रबाट तस्करीको घटना बढिरहेको र त्यसमा सुरक्षाकर्मीसमेतको सेटिङ रहेको चर्चा आइरहेको समयमा कोशी प्रदेशमा आआफ्नो सङ्गठनको नेतृत्व सम्हाल्दै केही दिन अघिमात्र आउनुभएका सशस्त्र प्रहरी बलका सशस्त्र प्रहरी नायब महानिरीक्षक कुमार न्यौपाने र नेपाल प्रहरीका प्रहरी नायब महानिरीक्षक इश्वर कार्कीले सिमा क्षेत्रबाट तस्करी नियन्त्रण गर्ने सन्दर्भमा कुनै कसुर नराख्ने दाबी गर्नुभएको छ। मधेश प्रदेशका अन्य जिल्लाहरूमा पनि यस्तै प्रतिबद्धताको अपेक्षा गरिएको छ।