बारा । बाराको सिम्रौनगढ नगरपालिकाको मेयर चढ्ने सरकारी गाडी बुधबार बिहान रौतहटको देवाही गोनाही नगरपालिका–५ स्थित नारायणचोक नजिक दुर्घटनामा परेको छ।

चपुरबाट कटहरिया हुँदै सिम्रौनगढतर्फ आउँदै गरेको बा २ झ ४३५४ नम्बरको स्कारपियो गाडी अनियन्त्रित भई दुर्घटनामा परेको इलाका प्रहरी कार्यालय देवाही गोनाहीले जानकारी दिएको छ। दुर्घटना बिहान करिब ११ः३० बजे नारायणचोकबाट २०० मिटर उत्तरतर्फ कटहरिया जाने सडक खण्डमा भएको हो।

गाडीमा चालकबाहेक अन्य कोही सवार थिएन। स्कारपियो गाडीमा चढाइएका जनप्रतिनिधि चन्द्रपुरका हुन् कि कटहरियाका भन्ने यकिन नभइसकेको सूचना अधिकारी सुरेश यादवले बताएका छन्। उनका अनुसार कलैयामा एक कार्यक्रममा सहभागी भएर फर्कँदै गरेका रौतहट क्षेत्रकै एक पालिकाका प्रमुखलाई सिम्रौनगढको गाडीले छोडेर फर्कने क्रममा दुर्घटना भएको हो।

दुर्घटनामा गाडी पूर्ण रूपमा क्षतिग्रस्त भएको छ। चालक सिम्रौनगढ नगरपालिका वडा नं.–१ बैरिया निवासी ४० वर्षीय मुस्तुफा आलम सामान्य अवस्थामा रहेका छन् र उनलाई गम्भीर चोटपटक लागेको छैन।

घटनाको जानकारी पाएलगत्तै इलाका प्रहरी कार्यालय देवाही गोनाहीबाट प्रहरी सहायक निरीक्षक अर्जुन मण्डलको नेतृत्वमा टोली घटनास्थलमा पुगेको थियो। प्रहरी टोलीले गाडी र चालकलाई नियन्त्रणमा लिएको छ भने घटनाबारे थप अनुसन्धान भइरहेको जानकारी दिएको छ।