काठमाडौँ । सुरक्षा निकायले लागुऔषध बरामद गर्दा त्यसलाई नष्ट गर्ने प्रचलन विश्वभर नै छ । नेपालमा पनि तपाईंले अवैध रक्सी पोखाएको, गाँजाको बोट फडानी गरेकोजस्ता समाचारहरू पनि पक्कै पढ्नु भएकै होला ।
टर्कीमा पनि यसरी नै लागुऔषध नष्ट गर्दा एउटा अनौठो घटना सार्वजनिक भएको छ । टर्कीको डियारबाकिर प्रान्तमा प्रहरीले बरामद गरेको ठुलो मात्राको गाँजा नष्ट गर्दा लिस सहरका २५ हजार बासिन्दा नै मातिन पुगेका हुन् ।
गत अप्रिल १८ मा टर्कीका अधिकारीहरूले उक्त सहरमा २० टनभन्दा बढी अवैध गाँजा नष्ट गर्न जलाउने निधो गरे । तर, त्यति ठुलो मात्रामा गाँजा जलाउँदा सहरभरि नै गाँजा मिसिएको धुवाँ फैलियो ।
त्यसपछि मानिसहरूमा रिँगटा लाग्ने, मतिभ्रम हुने जस्ता मातिएका लक्षणहरू देखियो । गाँजाको धुवाँबाट लठ्ठिने डरले मानिसहरूले ५ दिनसम्म झ्याल खुला राखेनन् भने बाहिर जान पनि कम गरे ।
अडिटी सेन्ट्रलमा प्रकाशित रिपोर्टअनुसार उक्त गाँजाको मूल्य २६ करोड डलरभन्दा बढी थियो । यसको तौल २० टन, ७६६ किलो र ६७९ ग्राम थियो । यसलाई डियारबाकिर प्रान्तमा सन् २०२३ र २०२४ को बिचमा बरामद गरिएको थियो ।
स्थानीय संस्थाका अध्यक्ष याहा ओगेरले सुरक्षा अधिकारीहरूले लागुऔषधविरुद्धको लडाइँमा सफलता हात पारे पनि यसलाई नष्ट गर्ने तरिका भने सही नभएको बताए । त्यसमा पनि गाँजालाई लिस सहरको अक्षर बनाएर जलाउनु झन् ठुलो लापरबाही भएको जिकिर गरे ।
