प्रधानमन्त्री केपी शर्मा ओलीले भारत र पाकिस्तानलाई गौतम बुद्धको सन्देश अपनाउन सुझाव दिएपछि युद्धले पूर्णविराम पाएको दाबी गर्नुभएको छ । २५६९औँ बुद्ध जयन्तीको अवसरमा आज लुम्बिनीमा आयोजित विषेश समारोहलाई सम्बोधन गर्दै उहाँले दुई देशबीच उत्पन्न पछिल्लो तनाव अन्त्यकाे लागि नेपालले महत्वपूर्ण भूमिका खेलेको जिकिर गर्नुभएको हो । नेपालले सुझाव नदिएको भए दुई देशबीचको युद्ध अझै लम्बिनसक्ने प्रधानमन्त्रीको विश्लेषण छ ।

‘भारत र पाकिस्तानबीच हात हालाहालको स्थिति सिर्जना भइसकेको थियो’, उहाँले भन्नुभयो, ‘तर हामीले दुवै देशलाई बुद्धको सन्देश स्मरण गराएर संयम र संवादको मार्ग रोज्न आग्रह गयौँ ।’

विश्व शान्ति कायम गर्न बुद्धको शिक्षाले अतुलनीय योगदान दिएको प्रम ओलीले बताउनुभयो । ‘बुद्धका शिक्षा र सन्देशका मुल आधार भनेको शान्ति, सहिष्णुता, करुणा, प्रेम र मानवता हुन्, यी कुराहरुलाई आत्मसात नगर्दासम्म विश्व शान्ति सम्भव छैन, यसरी पनि बुद्धको स्तरलाई मापन गर्न सक्छौ’, उहाँले थप्नुभयो ।