वीरगञ्ज । विश्व रेडक्रस दिवसको अवसरमा नेपाल रेडक्रस सोसाइटी रेशमकोठी उपशाखाद्वारा आयोजित कार्यक्रमलाई सम्बोधन गर्दै प्रमुख अतिथी तथा नेपाल रेडक्रस सोसाइटी पर्सा जिल्ला सदस्य मुना खनालले तन, मन र धनले मानवताको पक्षमा समर्पित रहनु पर्ने आवश्यकता औंल्याउनु भयो। उहाँले रेडक्रसकर्मीहरू सधैं दिनदुःखी, असहाय र पीडितहरूको सेवा र सहयोगमा अग्रसर हुनुपर्ने कुरामा जोड दिँदै आफु सधैं रेडक्रसको अभियानमा साथ रहने प्रतिवद्धता व्यक्त गर्नुभयो।
कार्यक्रमको सुरुवात रेडक्रसका संस्थापक जान हेनरी ड्युनाँको तस्बिरमा माल्यार्पण र दीप प्रज्वलनसहित शुभकामना मन्तव्यबाट भएको थियो। प्रमुख अतिथी खनालले हिंसालाई त्यागेर शान्तिको बाटो रोज्न सबैलाई आग्रह समेत गर्नु भयो।
कार्यक्रममा वरिष्ठ सदस्य तथा समाजसेवी अधिवक्ता प्रकाश उपाध्यायले स्वागत मन्तव्य राख्दै रेडक्रसमा संलग्न हुने प्रत्येक व्यक्तिमा मानवता अनिवार्य हुनुपर्ने बताउनुभयो। उहाँले भन्नुभयो, “मानवता बिना रेडक्रस मात्र हैन, समाज, देश र सारा विश्व नै अपुरो हुन्छ। वर्तमानमा विश्व हिंसाको चपेटामा रहेको यो अवस्थामा हामी सबैले मानवीय मूल्य र कल्याणमा केन्द्रित हुन जरुरी छ।”
रेशमकोठी उपशाखाका उपसभापति सरिता यादवको अध्यक्षतामा सम्पन्न कार्यक्रममा पुर्व उपशाखा सभापति नारायण यादव, पूर्व उपसभापति सुरेन्द्र प्रसाद कानु, सहसचिव राजु साह, सहकोषाध्यक्ष अभिलाष गुप्ता, सदस्यहरू रामसुदिष्टलाल कर्ण, नवराज भट्टराई, सोनु पटेल लगायतको उल्लेखनीय उपस्थिति रहेको थियो।
अध्यक्ष सरिता यादवले कार्यक्रममा बोल्दै “हामीले बाह्य युद्ध मात्र होइन, आन्तरिक द्वन्द्व र नकारात्मक सोचमाथि विजय प्राप्त गर्नुपर्छ,” भन्दै सम्पूर्णलाई रेडक्रस दिवसको शुभकामना व्यक्त गर्नुभयो।
कार्यक्रमको सहजीकरण गरेका सचिव लालबाबु सिंहले रेडक्रसको उत्पत्ति युद्धको भूमिमा घाइतेहरूको सेवा र उपचारमार्फत् भएको स्मरण गर्दै अहिले रेडक्रसले विश्वभर मानवताको आशा र भरोसा प्रदान गरिरहेको बताउनुभयो। दुई छिमेकी देशहरूबीच भइरहेको युद्धप्रति चिन्ता व्यक्त गर्दै उहाँले विश्व समुदायलाई शान्तिको पहल गर्न पनि आग्रह गर्नुभयो।
कार्यक्रमले मानवता, सेवा र शान्तिको सन्देश दिँदै रेडक्रस अभियानमा समर्पण र सहभागिताको आवश्यक्ता झल्काएको थियो।
