पर्सा । पर्साबाट सशस्त्र प्रहरीले ठूलो परिमाणमा लागूऔषध चरेस बरामद गरेको छ । खानेतेलको ग्यालेनभित्र चरेस भरेर बाँसघारीमा लुकाएर राखिएको बेवारिसे चरेस पोखरियाबाट सशस्त्र प्रहरीले बरामद गरेको हो ।
पोखरिया नगरपालिका– २ मननपुरस्थित बाँसघारीमा लुकाएर राखिएको अवस्थामा २४ किलो ५०० ग्राम चरेस बरामद गरिएको सशस्त्र प्रहरी नायब उपरीक्षक देबेन्द्रबहादुर सिंहले बताए ।

विशेष सुराकीको आधारमा सशस्त्र प्रहरी बेस क्याम्प पोखरियाबाट सशस्त्र प्रहरी नायब उपरीक्षक महेन्द्र सिंह थापाको नेतृत्वमा खटिएको टोलीले बेवारिसे अवस्थामा राखिएको दुईवटा ग्यालेन बरामद गरेको थियो ।

उक्त ग्यालेनभित्र प्लास्टिकको प्याकेट बनाएर राखिएको २४ किलो ५०० ग्राम चरेस बरामद भएको हो । बरामद चरेस इलाका प्रहरी कार्यालय पोखरियामा बुझाइएको र यस बारेमा थप अनुसन्धान भइरहेको सिंहले जानकारी दिए ।