वीरगन्ज । वीरगन्जमा बिहीबार भुमि समस्या समाधान आयोग पर्साकाे जिल्ला स्तरीय बैठक सम्पन्न भएको छ ।बिहीबार भुमि समस्या समाधान आयोग पर्साका अध्यक्ष तबरेज अहमदको अध्यक्षतामा जिल्ला प्रशासन कार्यालय पर्साको सभाहलमा सम्पन्न बैठकमा पर्सामा सञ्चालितल `तीन पालिका तीन महिने ऐक्सन प्लान अभियान´ बारे छलफल भयाे।आयोगले पर्सा जिल्लामा रहेका भुमिहिन सुकुम्बासी, भुमिहिन दलित तथा अव्यवस्थित वसोवासीहरुको समस्या र समाधानको लागी तीन महिने एक्सन प्लान अभियान सञ्चालनमा ल्याएको छ ।

बैठकमा अध्यक्ष अहमदले भूमि सम्बन्धी समस्या समाधानका लागि ३ महिने ऐक्सन प्लान अभियानलाई तीब्र बनाउने बताए । उनले भने,` ३ महिना भित्र भुमिहिनहरुलाई लालपुर्जा दिने लक्ष्य सहित यो अभियान सुरु गरिएको हो ।एक्सन प्लान अभियानको पहिलो चरणमा पर्सागढी नगरपालिकाका ४ सय ७१ जना भुमिहिनहरुलाई लालपुर्जा दिने अध्यक्ष अहमदले बताए।उनले पर्सागढी नगरपालिका जस्तै अन्य पालिकामा पनि तदारुकताका साथ काम अघि बढाइएको जानकारी दिए ।

अध्यक्ष अहमदले पर्साका सुकुम्बासीहरुलाई जग्गा उपलब्ध गराउन आफुले लगनशीलताका साथ कार्य गरिरहेको बताउदै आयोगबाट आउने कर्मचारीहरुलाई पालिकाले सहयोग गरि सहजीकरण गरिदिन अनुरोध समेत गरे । पर्सागढी नगरपालिका, सखुवा प्रसौनी गाउँपालिका र बहुदरमाई नगरपालिकामा आयोगले ३ महिने एक्सन प्लान अभियान अगाडि बढाएको उनले बताए ।

बैठकमा भुमि आयोगका केन्द्रिय सदस्य तथा मधेस प्रदेश संयाेजक आरती भण्डारीले अहिलेकाे आयोग अन्तिम आयोग हुने बताइन्। भुमिहिन सुकुम्बासी, भुमिहिन दलित तथा अव्यवस्थित बसोवासीहरुको समस्या र समाधान गर्ने गरि यो आयोगले काम गरिरहेको भण्डारीले जानकारी दिइन्।उनले कानुनी जटिलतालाई समाधान गरि नेपालभरिका सुकुम्बासीहरुलाई जग्गा बितरण गरिने बताइन् ।

बैठकमा पर्साका प्रमुख जिल्ला अधिकारी गणेश अर्यालले भुमिहिन दलित ,भुमिहिन सुकुम्बासी र अव्यवस्थित बसोवासीहरुका लागि एक्सन प्लान अभियानले लालपुर्जा दिने बताए । उनले आयोगले संचालन गरिरहेका अभियानमा पूर्ण सहयोग गर्नुपर्ने बताउँदै, गरिब निमुखाको हक्मा काम गर्न र समस्या समाधान गर्नेतर्फ आफु अग्रसर रहेको बताए।

बैठकमा आयाेगका सदस्य शिव नारायण राम,विज्ञ सदस्य सन्तोष कुमार पासवान, जिल्ला समन्वय समिति पर्साका प्रतिनिधी सुमित सिंह, भुमि तथा मालपोत कार्यालय पर्साका प्रमुख शाेक भट्टराई, विनय श्रीवास्तव भुमि समस्या समाधान आयोग समस्य , डिविजन वन कार्यालय पर्साका प्रतिनिधी सन्दिप पटेल, जिल्ला प्रशासन कार्यालय पर्साका प्रशासकीय अधिकृत दिपक कुमार पटेल र पालिका प्रतिनिधी तथा भुमि समस्या समाधानका सदस्यहरू उपस्थिति रहेको थियो । कार्यक्रमको सहजीकरण भुमि समस्या समाधान आयोग पर्साका सदस्य सचिव राकेश कुमार झालले गरेका थिए ।