काठमाडौं । सरकारले नागरिक एप सञ्चालन तथा व्यवस्थापन निर्देशिका २०७८ खारेज गर्ने निर्णय गरेको छ । आइतबार बसेको मन्त्रिपरिषद् बैठकले यस्तो निर्णय गरेको हो ।

सूचना प्रविधि विभागका महानिर्देशक रमेश शर्मा पौडेलका अनुसार अब नागरिक एप सञ्चालन तथा व्यवस्थापनका लागि सञ्चार तथा सूचना प्रविधि मन्त्रालयले ‘दिग्दर्शन’ तयार पार्नेछ ।

“मन्त्रीपरिषद्‌ले बनाएको निर्देशिका संशोधन तथा परिमार्जन गर्नु परेको खण्डमा पुनः मन्त्रिपरिषद्‌‌मै लैजानुपर्ने बाध्यता रहेको थियो,” उनले भने, “मन्त्रालय तथा मन्त्री स्तरीय निर्णयबाटै नागरिक एप सञ्चालनका लागि आवश्यक निर्णय गर्न सकिने बाटो खुलाउन निर्देशिका खारेज गरिएको हो ।”

निर्देशिका खारेज नहुन्जेलसम्म मन्त्रालयले दिग्दर्शन तयार पार्ने काम थाल्न नमिल्ने भएकाले सुरुमा निर्देशिका खारेज गर्ने निर्णय मन्त्रिपरिषद्‌‌​बाट भएको र अब मन्त्रालय तथा विभागले दिग्दर्शनको तयारी थाल्ने महानिर्देशक शर्माको भनाइ छ ।

यसबाहेक मन्त्रिपरिषद्ले बैठकले १५-१७ जेठमा जापानको राजधानी टोकियोमा आयोजना हुने एसिया प्यासिफिक टेलिकम्युनिटी (एपीटी) मन्त्री स्तरीय बैठकमा सहभागी हुन सञ्चार तथा सूचना प्रविधिमन्त्री पृथ्वी सुब्बा गुरुङलाई स्वीकृति दिने निर्णय समेत गरेको छ ।