काठमाडौं । चीनले व्यावसायिक रूपमा उड्ने ट्याक्सी सञ्चालन गर्न दुई कम्पनीलाई अनुमति प्रदान गरेको छ । त्यहाँको नागरिक उड्डयन नियामक सिभिल एभिएसन एड्मिनिस्ट्रेसन अफ चाइना (सीएएसी) ले ईहाङ (EHang Holdings) र हेफेई हे एअरलाइन्स (Hefei Hey Airlines) लाई एयर अपरेटरको अनुमति पत्र जारी गरेको हो ।
लामो प्रकृयापछि यी दुई कम्पनीले यात्री ड्रोन (अटोनोमस प्यासेन्जर ड्रोन) सञ्चालनको अनुमति पाएको चिनियाँ सञ्चारमाध्यम साउथ चाइना मर्निङ पोस्टले जनाएको छ । योसँगै चीनमा पाइलट बिनाका अर्थात् स्वचालित हवाई यान सञ्चालन हुने बाटो खुलेको छ ।
पर्यटकहरूलाई सहर घुमाउनका लागि यी उड्ने ट्याक्सी प्रयोगमा ल्याइने बताइएको छ ।
चीनले पछिल्लो समयमा लो-अल्टिचुड इकोनोमीको विकासमा श्रृङ्खलाबद्ध रूपमा काम गरिरहेको छ । लो-अल्टिचुड अर्थतन्त्र (Low-Altitude Economy)ले हवाई क्षेत्रको कम उचाइमा हुने आर्थिक गतिविधिलाई जनाउँछ । जुन प्रायः ड्रोन, हलुका हवाई साधनहरू र कम उचाइमा सञ्चालन हुने प्रविधिसँग सम्बन्धित हुन्छ ।
यो अवधारणा विशेषगरी आधुनिक प्रविधि प्रयोग गरेर विभिन्न सेवा प्रदान गर्ने र आर्थिक लाभ लिने कुरामा केन्द्रित छ । चीनको लो-अल्टिचुड इकोनोमी २०२५ सम्ममा १.५ ट्रिलियन यूआन र २०३५ सम्ममा २.५ ट्रिलियन यूआनसम्म बढ्ने अनुमान छ ।
