रौतहट । मधेश प्रदेशका मुख्यमन्त्री सतीश कुमार सिंहको निर्देशन अवज्ञा गर्दै सञ्चालनमा रहेको एक निजी अस्पतालका सञ्चालकलाई प्रहरीले पक्राउ गरेको छ।
रौतहटको गरुडा नगरपालिका-५, शिवनगरस्थित आनन्द हस्पिटल एक्युपञ्चर सेन्टरका सञ्चालक उमेश प्रसाद जयसवाललाई प्रहरीले नियन्त्रणमा लिएको हो।
मुख्यमन्त्री सिंहले केही दिनअघि अस्पतालको अनुगमन गर्दै आवश्यक मापदण्ड पूरा नभएको भन्दै तत्काल बन्द गर्न निर्देशन दिएका थिए। तर, उक्त निर्देशनको अवहेलना गर्दै अस्पताल सञ्चालन भइरहेकाले प्रहरीले जयसवाललाई पक्राउ गरेको जिल्ला प्रहरी कार्यालय रौतहटले जनाएको छ।
इलाका प्रहरी कार्यालय शिवनगरका सई बब्लु कान्त झाको नेतृत्वमा गएको प्रहरी टोलीले आज बिहान ११ बजे जयसवाललाई पक्राउ गरेको हो।
जिल्ला प्रहरी कार्यालय रौतहटका प्रवक्ता डिएसपी दीपककुमार रायका अनुसार जयसवाललाई अनुसन्धानका लागि हिरासतमा लिइएको छ। डिएसपी रायले भने, ‘प्रदेश सरकारको निर्देशन अनुसार अस्पताल बन्द गर्न भनिएको थियो। तर, किन बन्द गरिएन भन्ने विषयमा सोधपुछ भइरहेको छ।’
प्रहरी स्रोतका अनुसार अस्पताल सञ्चालनमा कानुनी त्रुटि रहे/नरहेकोबारे थप अनुसन्धान भइरहेको छ।
