बारा | बारा प्रहरीले १३ किलो अवैध लागू औषध गाँजासहित एकजनालाई पक्राउ गरेको छ। विशेष सूचनाको आधारमा मिति २०८१ फागुन २८ गते बिहान ८:१५ बजे जितपुरसिमरा उपमहानगरपालिका-३, बजनीस्थित वीरगञ्ज–पथलैया सडक खण्डमा चेकजाँचको क्रममा गाँजा बरामद गरिएको हो।

अस्थायी प्रहरी पोष्ट रामबनबाट प्रहरी नायब निरीक्षक दिलीप कुमार सिंहको कमाण्डमा खटिएको टोलीले हेटौंडाबाट वीरगञ्जतर्फ जाँदै गरेको ना ८ ख ६०६१ नम्बरको यात्रुबाहक माइक्रोबस रोकी चेकजाँच गर्दा, सवारीमा सवार एक महिलाको साथमा रहेको दुईवटा बोराभित्र १३ किलो गाँजा फेला परेको थियो।

पक्राउ पर्नेमा मकवानपुर जिल्लाको राक्सिराङ गाउँपालिका-१ निवासी किरण गोलेकी श्रीमती ५० वर्षीया सुशिला गोले रहेकी छन्। हाल उनलाई आवश्यक कानुनी कारबाहीको लागि अगाडि बढाइएको प्रहरीले जनाएको छ।