र्पसा । आउँदो स्वतन्त्र विद्यार्थी युनियन (स्ववियु) निर्वाचनलाई सुरक्षित, निष्पक्ष र व्यवस्थित बनाउन जिल्ला प्रशासन कार्यालय र्पसामा सुरक्षा निकाय तथा सम्बन्धित निकायहरूको समन्वय बैठक सम्पन्न भएको छ।
प्रमुख जिल्ला अधिकारी गणेश आचार्यको अध्यक्षतामा सम्पन्न बैठकमा जिल्लास्थित सुरक्षा संयन्त्र, त्रिभुवन विश्वविद्यालयअन्तर्गतका क्याम्पस प्रतिनिधिहरू, विद्यार्थी संगठनका नेताहरू तथा सरोकारवाला निकायका पदाधिकारीहरूको उपस्थिति रहेको थियो।
बैठकमा निर्वाचन प्रक्रियालाई सुरक्षित बनाउन आवश्यक रणनीतिहरू तयार पारिएको छ। सहभागीहरूले त्रिभुवन विश्वविद्यालयको निर्वाचन निर्देशिकाको पूर्ण पालना गर्नुपर्ने, निर्वाचनको दौरानमा कुनै पनि प्रकारको अवाञ्छित गतिविधि नगर्न/नगराउन आग्रह गरिएको छ। साथै, विद्यार्थी परिचयपत्र सम्बन्धित विद्यार्थीहरूलाई मात्र वितरण गर्ने, सुरक्षा संयन्त्रलाई सतर्क राख्ने तथा कुनै पनि विवाद उत्पन्न भएमा कानुनी प्रक्रिया अनुरूप समाधान गर्ने निर्णय गरिएको छ।
समन्वय बैठकमा सहभागीहरूले निर्वाचनको शान्तिपूर्ण सम्पन्नताका लागि आवश्यक सुरक्षात्मक उपायहरू अवलम्बन गर्ने प्रतिबद्धता जनाएका छन्।
बैठकमा उपस्थित सरोकारवाला निकायका प्रमुखहरूले हस्ताक्षर गर्दै निष्पक्ष निर्वाचन सुनिश्चित गर्न सामूहिक सहकार्य गर्ने निर्णय गरेका छन्।
