वीरगञ्ज। जीतपुरसिमरा उपमहानगरपालिका–२२ स्थित अमलेखगञ्जमा आइतबार राति भएको सवारी दुर्घटनामा एक जनाको मृत्यु भएको छ भने अर्का एक जना घाइते भएका छन्।

पथलैया तर्फ जाँदै गरेको बसले अमलेखगञ्जको होटेल क्विकट्वेन्टी नजिक प्र.०२–०३–०१३प ३२३३ नम्बरको मोटरसाइकललाई ठक्कर दिएको हो। ठक्करबाट मोटरसाइकल चालक घटनास्थलमै मृत्यु भएको र अर्का एक जना घाइते भएका छन्।

घटनाको बारेमा जानकारी पाउनासाथ स्थानीय वडाध्यक्ष सुवास श्रेष्ठको नेतृत्वमा प्रहरी र स्थानीयवासीहरूले उद्धार कार्य सुरु गरेका थिए। मृतक र घाइतेको पहिचान भने तत्काल खुल्न सकेको छैन। घाइतेलाई उपचारका लागि हेटौँडा अस्पताल पठाइएको छ।

दुर्घटनापछि बस फरार भए पनि प्रहरीले रातोमाटे क्षेत्रमा बसेको बसलाई नियन्त्रणमा लिएको जनाएको छ। यस दुर्घटनाले क्षेत्रका स्थानीय बासिन्दाहरूमा शोकको वातावरण सिर्जना भएको छ।