पर्सा । पर्साको धोबिनी गाउँपालिकामा यही माघ ३० गतेदेखि सुरु हुन गइरहेको किशोरीहरुको पाठेघरको मुखमा हुने क्यान्सरविरुद्धको एच.पि.भी. खोप अभियान सम्बन्धी आज एक अभिमुखीकरण कार्यक्रम सम्पन्न भएको छ।

स्वास्थ्य शाखा धोबिनीले आयोजना गरेको पालिका स्तरीय खोप समन्वय समिति तथा सरोकारवालासँगको अभिमुखीकरण कार्यक्रममा खोप अभियानका बारेमा जानकारी गराइएको हो। धोबिनी गाउँपालिकाको सभाहलमा आयोजित कार्यक्रममा स्वास्थ्य शाखा प्रमुख काबिन्द्र यादवले माघ ३० देखि फागुन १ गतेसम्म पालिकाका पाँच वडामा सञ्चालन हुने अभियानमा करिब २ हजार ५ सय जना बालिका र किशोरीलाई एच.पि.भी. खोप लगाइने जानकारी गराए।

उक्त अभियानअन्तर्गत विद्यालयमा अध्ययनरत कक्षा ६ देखि कक्षा १० सम्मका तथा विद्यालय बाहिर रहेका १० देखि १४ वर्षसम्मका बालिका र किशोरीलाई खोप लगाइने उनले बताए। यादवले स्वास्थ्यकर्मीहरूलाई कुनै पनि आग्रह वा पूर्वाग्रह नराखी लक्षित उमेर समूहका बालिका तथा किशोरीलाई खोप दिन आग्रह गरे।

सहयोगको लागि आग्रह
गाउँपालिका प्रमुख प्रशासकीय अधिकृत अशोक कुमार रौनियारले धोबिनी गाउँपालिकाभित्रका सबै बालिका तथा किशोरीलाई एच.पि.भी. खोप लगाउनका लागि अभिभावकहरूलाई सचेत रहन आग्रह गरे। साथै, अभियानलाई सफल बनाउन जनप्रतिनिधि, शिक्षक, राजनीतिकर्मी तथा सरोकारवाला सबैको सहकार्य आवश्यक रहेको उनले उल्लेख गरे।

स्वास्थ्य शाखा प्रमुख यादवका अनुसार एच.पि.भी. खोपको कुनै पनि नकारात्मक असर नरहेको हुँदा ढुक्क भएर बालिका तथा किशोरीहरूलाई खोप लगाउन गाउँबासीलाई अनुरोध गरिएको छ। नेपालमा दैनिक चार जना महिलाको मृत्यु पाठेघरको क्यान्सरका कारण हुने गरेको जानकारी दिँदै उनले यो खोप लगाएपछि पाठेघरको क्यान्सर नहुने विश्वास रहेको बताए।

कार्यक्रममा व्यापक सहभागिता
गाउँपालिका प्रमुख प्रशासकीय अधिकृत रौनियारको अध्यक्षतामा सम्पन्न कार्यक्रममा वडाध्यक्ष अबास मिया, राजकिशोर प्रसाद कुर्मी, बन्धु साह तेली, शिक्षा शाखा प्रमुख विजकिशोर त्रिपाठी, स्वास्थ्य शाखाका सहसंयोजन मनु पटेल, योजना शाखा प्रमुख पपु पटेल, जिन्सी प्रमुख प्रदीप पटेल, इन्जिनियर रविभूषण पटेल, तेजेन्द्र माली, गणेश शाही, दिलीप पटेल, कार्यपालिका सदस्य, विद्यालयका शिक्षक, स्वास्थ्यकर्मी तथा कर्मचारीहरूको उल्लेखनीय उपस्थिति रहेको थियो।