वीरगञ्ज । सशस्त्र प्रहरी बल, प्रस्तावित सीमा सुरक्षा गुल्म वीरगञ्जले भन्सार छली गरी ल्याइएका मोबाइल पार्ट्स, इलेक्ट्रोनिक सामग्री तथा पशु चौपायासहित करिब चार लाख रुपैयाँ बराबरका सामान बरामद गरेको छ।

डीएसपी लोकेन्द्र सुब्बाको कमाण्डमा खटिएको प्रहरी टोलीले विशेष सूचनाका आधारमा वीरगञ्ज महानगरपालिका–१०, गोश्वारा सडकखण्डमा मोटरसाइकलको खानतलासी गर्दा अवैध रूपमा भन्सार छलिएको दुई लाख रुपैयाँ बराबरका मोबाइल पार्ट्स तथा इलेक्ट्रोनिक सामग्री फेला पारेको हो। सो मोटरसाइकलको मूल्य पनि दुई लाख रुपैयाँ रहेको हुँदा बरामद गरिएको सम्पूर्ण सामग्रीको मूल्य चार लाख रुपैयाँ बराबर पुगेको डिएसपी सुब्बाले जानकारी दिए।

बरामद सामग्री र मोटरसाइकललाई आवश्यक कानुनी कारबाहीका लागि वीरगञ्ज भन्सार कार्यालयमा बुझाउने प्रक्रिया भइरहेको बताइएको छ।

त्यस्तै, आजैको दिन डीएसपी लोकेन्द्र सुब्बाको नेतृत्वमा खटिएको अर्को टोलीले विशेष सूचनाको आधारमा वीरगञ्ज महानगरपालिका–१, भकुवा खोला नाकाबाट अवैध रूपमा भित्र्याइँदै गरेको करिब ५० हजार रुपैयाँ बराबरको १ वटा भैंसी र १ वटा पाडा नियन्त्रणमा लिएको छ।

सशस्त्र प्रहरी नायब उपरीक्षक सुब्बाले खुला सीमाको फाइदा उठाउँदै भन्सार छली गरी अवैध सामान भित्र्याउने कार्यलाई रोक्न सशस्त्र प्रहरी बलको सक्रियता बढाइएको बताए। बरामद सबै सामानलाई आवश्यक प्रक्रिया पूरा गरी वीरगञ्ज भन्सार कार्यालयमा बुझाइएको जानकारी समेत उनले दिए।