वीरगंज । सामाजिक सञ्जालमा हतियार प्रदर्शन गरेको भन्दै नेपाल प्रहरीले पक्राउ गर्यो ७ जना
सामाजिक सञ्जालमा हतियार प्रदर्शन गरेको भन्दै नेपाल प्रहरीले पक्राउ गर्यो ७ जना

काठमाडौँ । सामाजिक सञ्जालमा हतियार देखाउने र त्यसको प्रयोग गरी केक काट्ने, दादागिरी देखाउने जस्ता गतिविधि गरेको आरोपमा ७ जनालाई प्रहरीले पक्राउ गरेको छ । काठमाडौँ उपत्यका अपराध अनुसन्धान कार्यालयको टोलीले बुधबार काठमाडौँ र काभ्रेबाट उनीहरूलाई पक्राउ गरेको हो ।

पक्राउ पर्नेहरूमा गोपाल मोक्तान, गुणबहादुर गुरुङ, रोमन मगर, सुमन पराजुली, मनोहर थापा मगर, रोनिस बरामु र रोशन तामाङ रहेका छन् । कार्यालयका प्रवक्ता एवं प्रहरी उपरीक्षक काजीकुमार आचार्यका अनुसार उनीहरूले सामाजिक सञ्जाल (विशेष गरी टिकटक र इन्स्टाग्राम) मा धारिलो हतियार प्रदर्शन गर्ने र त्यसले केक काट्ने जस्ता कार्य गरी सार्वजनिक शान्ति भङ्ग गर्ने र डर सिर्जना गर्ने गतिविधि गर्दै आइरहेका थिए।

“उनीहरूले सामाजिक सञ्जालमा हतियार देखाएर डर सिर्जना गरेकाले त्यसलाई अभियानकै रूपमा लिएर पक्राउ गरेका हौँ,” आचार्यले भने । प्रहरीले उनीहरूमाथि थप अनुसन्धान गरिरहेको छ ।