वीरगंज | अमेरिकी राष्ट्रपति डोनाल्ड ट्रम्पले क्यानडा, मेक्सिको र चीनमाथि थपेको करले उद्योग जगत चिन्तित बनेको छ। हालै कर बढाइएका यी देशहरूले विरोध गरेका छन् भने अमेरिका लगायत एसियाली देशका उद्योगीले ट्रम्पको कर नीतिले व्यवसाय चौपट हुने चिन्ता व्यक्त गरेका छन्।

उद्योग व्यवसायसँग सम्बन्धित अधिकांश अमेरिकी संगठनले ट्रम्पको नीतिको विरोध गरेका छन्। उनीहरूले विदेशी सामानमा बढेको करले अमेरिकालाई नै असर पर्ने चेतावनी दिएका छन्। नेसनल एसोसिएसन अफ होम बिल्डर्स, अमेरिकन अप्यारल एण्ड फुट वेयर एसोसिएसन, युनाईटेड वर्कर्स, डिस्टिल्ड स्पिरिट्स काउन्सिल लगायतका संस्थाले विरोध जनाएका छन्।

उता कर थोपारिएका देशहरूले ट्रम्पको कर नीतिको विरोध गरेका छन्। मेक्सिकोकी राष्ट्रपति क्लाउडिया शिनबामले जवाफी कर लगाउने घोषणा गरेका छन्। उहाँले आफूले अर्थमन्त्रीलाई यसबारे योजना बनाउन निर्देशन दिइसकेको समेत बताएका ५न्। सथै राष्ट्रपति शिनबामले आफ्नो नेतृत्वको सरकारलाई आपराधिक संगठनसँगको गठबन्धन भनिएकोमा आपत्ति प्रकट गरेका छन्। यस्तै क्यानडाका प्रधानमन्त्री जस्टिन ट्रुडोले पनि करको बदलामा कर लगाउने घोषणा गरेका छन्।

उनले आइतबार पत्रकार सम्मेलन गरी अमेरिकी उत्पादनमा अमेरिकाले जस्तै २५ प्रतिशत कर लगाउने घोषणा गरेका हुन्। १५५ अर्ब डलर बराबरको अमेरिकी उत्पादनमा क्यानडाले २५ प्रतिशत कर लगाउने ट्रुडोले बताएका छन्। क्यानडाका कैयौँ प्रान्तले अमेरिकी कर नीतिको विरोधमा आन्तरिक सकुर्लर जारी गरेका छन्। चीनले पनि राष्ट्रपति ट्रम्पको कदम प्रति आपत्ति जनाएको छ।