वीरगञ्ज । प्रतिनीधि सभा सदस्य प्रभु हजराले वीरगञ्जस्थित नारायणी अस्पतालको निरीक्षण गरेका छन् । बुधवार नारायणी अस्पतालको निरीक्षण गर्दै सांसद हजराले अस्पतालको अवस्था पहिलेको तुलनामा धेरै सुधार भएको प्रतिक्रिया दिए । उनकाअनुसार अस्पतालमा अहिले राम्रो व्यवस्थापन भइरहेको छ ।

पर्सा, बारा मात्रै नभएर मकवानपुरसम्म्का र रौतहटदेखि सर्लाहीसम्मका बिरामी उपचारका लागि नारायणी अस्पतालमा आएको उनले बताए । बिरामी र उनीहरुका कुरुवासँग पनि उनले संवाद गरेका थिए । सो अवसरमा सहज ढंगले उपचार पाएको उनीहरुले बताएका थिए ।

आफु २५ वर्ष अघि नारायणी अस्पताल विकास समितिको सदस्य भएको क्षण स्मरण गर्दै उनले नारायणी अस्पताल सबै जनताको साझा अस्पताल भएको दाबी गरे । अस्पतालको विकास र स्तरोन्नतीका लागि आफु सँधै गम्भिर भएको पनि उनले बताए ।

अस्पतालको भवन निर्माण प्रक्रिया पनि भवन विभाग र निर्माण कम्पनीबीचको विवादले अल्झिएकोमा उनले आपत्ती जनाए । यही २८ गते परेको पेशीबाट उक्त मुद्दा टुङ्गो लगाउन र भवन निर्माणको प्रक्रिया अघि बढाउन दबाब दिनुपर्नेमा उनले जोड दिए ।

प्रयोगशाला (ल्याब) मा पनि अनलाईन प्रणालीबाट सेवा प्रवाह गर्ने व्यवस्था मिलाइएको छ । क्यु आर कोडबाटै एउटै ठाउँबाट सहज ढंगले सेवा लिन सकिने व्यवस्था मिलाइएको नारायणी अस्पतालका मेडिकल सुपरिटेण्डेण्ट डा. चुमनलाल दासले बताए । उनकाअनुसार अस्पतालमा नियमित रुपमा सरसफाई गरिनुका साथै छिटै भवनको रंगरोगन गर्ने कामको तयारी पनि भइरहेको छ ।
बिरामीलाई रिफर गर्न नपर्ने गरी काम गरीरहेको उनको भनाई छ । यदि नारायणीमै उपचार सम्भव भएर पनि रिफर गरिन्छ भने रिफर गर्ने चिकित्सकलाई कारवाही गरिने पनि उनले चेतावनी दिए । आईसियु, एनआईसियु सीमित संख्यामा भएकाले अवावश्यकताअनुसार रिफर गर्न पनि उनले बताए ।

२०४८ सालको दरबन्दीका आधारमा अस्पताल चलीरहेको हुँदा पूर्वाधार र जनशक्तिको समस्यासँग अस्पताल जुधिरहेको उनको भनाई छ ।