वीरगञ्ज । राष्ट्रिय स्वतन्त्र पार्टी (रास्वपा) का सभापति तथा पूर्व गृहमन्त्री रवि लामिछाने काठमाडौँ जिल्ला अदालतमा उपस्थित भएका छन् । उनलाई थुनछेक बहसका लागि अदालतमा पेस गरिएको हो ।

आइतबार बयान लिएपछि थुनछेक प्रक्रिया नसकिएकाले लामिछानेलाई न्यायिक हिरासतमा राखिएको थियो । सोमबारदेखि सुरु भएको थुनछेक बहस मङ्गलवार सार्वजनिक बिदाका कारण रोकिएको थियो। हाल न्यायाधीश माधव अधिकारीको इजलासमा चलिरहेको बहसपछि उनलाई पुर्पक्षका लागि थुनामा पठाउने कि धरौटीमा रिहा गर्ने भन्ने निर्णय हुनेछ ।

लामिछानेसहित ३९ जनाविरुद्ध स्वर्णलक्ष्मी बहुउद्देश्यीय सहकारी संस्थाको रकम अपचलनको आरोपमा मुद्दा दर्ता गरिएको छ । यस प्रकरणमा सहकारीका कोषाध्यक्ष कुमार रम्तेल, व्यवस्थापक नवीन अछामी, र पूर्व डिआइजी छविलाल जोशीलगायतलाई प्रतिवादी बनाइएको छ । प्रहरी अनुसन्धान अनुसार, सहकारीका ५,६६९ बचतकर्ताका २ अर्ब ६५ करोड ९५ लाख रुपैयाँभन्दा बढी रकम अपचलन गरिएको पाइएको छ ।

अनुसन्धानमा सहकारीमार्फत गोर्खा मिडिया नेटवर्क प्रालिमा ६४ करोडभन्दा बढी रकम कारोबार गरिएको तथ्य बाहिर आएको छ । यसअघि सोही आरोपमा पक्राउ परेका सहकारीका लेखा समिति सदस्य सुनिता नेवा र सञ्चालक समिति सदस्य कमल लामालाई अदालतले धरौटीमा रिहा गरिसकेको छ ।

लामिछाने पोखराको सूर्य दर्शन सहकारी प्रकरणमा पनि संलग्न रहेको आरोपमा कास्की जिल्ला अदालतबाट ६५ लाख धरौटीमा रिहा भएका थिए । उनको विरुद्ध चितवन, रुपन्देही, र पर्सामा समेत सहकारी ठगीका मुद्दा दायर भएका छन्। ती मुद्दामा उनीमाथि अनुसन्धान सकिएको बताइएको छ ।

सहकारी पीडितहरूबाट ९३ वटा उजुरी परेको यो प्रकरणले सहकारी व्यवस्थापनमा देखिएका चुनौती र सुधारको आवश्यकता पुनः उजागर गरेको छ ।