वीरगञ्ज । प्रधानमन्त्री कप महिला राष्ट्रिय क्रिकेट प्रतियोगितामा खेल्नका लागि मधेस प्रदेशको १४ सदस्यीय टोलीको घोषणा भएको छ । टोलीमा वीरगञ्जकी शिवानी साह र प्रज्ञा क्षेत्री पर्न सफल भएका छन् । शिवानी र प्रज्ञाले मधेस प्रदेशलाई राष्ट्रिय स्तरमा प्रतिनिधित्व गर्दै वीरगञ्जको खेलकुद क्षेत्रमा नयाँ उत्साह थपेका छन् ।

धनगढीमा जारी प्रतियोगितामा मधेस प्रदेश क्रिकेट सङ्घले मङ्गलवार सरस्वती चौधरीको कप्तानीमा टोली घोषणा गरेको थियो । उपकप्तान साक्षी यादवसहित टोलीमा शिवानी र प्रज्ञास्थित प्रतिमा साह, चादनी खातुन, भूमि सिंह, मोनिका साह, श्रेया थापा, अनु चौधरी, बन्दना रजक, रोजी कडारी, सिमा कुवर, र दीपा राम रहेकी छन् ।

टोलीमा वीरगञ्जबाट शिवानी साह र प्रज्ञा क्षेत्रीले स्थान पाएको पर्सा क्रिकेट सङ्घका अध्यक्ष मनिष सिंहले जानकारी दिए । उनीहरूले मधेस प्रदेश टोलीका लागि लागि महत्त्वपूर्ण योगदान दिने सिंहले विश्वास व्यक्त गरे ।

शिवानी र प्रज्ञा वीरगञ्जका स्थानीय खेलाडी हुन् । यसअघि मधेस प्रदेशस्तरीय प्रतियोगितामा उत्कृष्ट प्रदर्शन गर्दै उनीहरूले राष्ट्रिय स्तरको प्रतियोगितामा स्थान सुरक्षित गरेका हुन् । उनीहरूको मेहनत र समर्पणले वीरगञ्ज र आसपासका क्रिकेट प्रेमीहरूलाई गौरवान्वित बनाएको छ ।

प्रधानमन्त्री कप महिला राष्ट्रिय क्रिकेट प्रतियोगितामा ७ प्रदेश र २ विभागीय टोली गरी कुल ९ टोलीले प्रतिस्पर्धा गरिरहेका छन् । मधेस प्रदेश दोस्रो समूहमा रहेको छ, जहाँ यसले त्रिभुवन आर्मी क्लब, कोसी प्रदेश र बागमती प्रदेशसँग प्रतिस्पर्धा गर्नेछ ।

माघ ६ गतेदेखि १२ गतेसम्म धनगढीस्थित फाप्ला क्रिकेट मैदानमा सञ्चालन हुने प्रतियोगितामा शिवानी र प्रज्ञाको प्रदर्शन हेर्न वीरगञ्जवासी निकै उत्साहित छन् ।

मधेस प्रदेश क्रिकेट सङ्घले कलैयामा आयोजना गरेको क्षेत्रीय प्रतियोगिताबाट छनोट भएका खेलाडीहरूको नाम सार्वजनिक गरेपछि वीरगञ्जका खेल प्रेमीहरूले शिवानी र प्रज्ञाको उपलब्धिलाई गर्वको रूपमा लिएका छन् । यस उपलब्धिले वीरगञ्जका युवालाई खेलकुद क्षेत्रमा लाग्न थप प्रेरित गर्ने विश्वास गरिएको छ ।

शिवानी र प्रज्ञाले आफ्नो प्रदर्शनले वीरगञ्ज र मधेस प्रदेशलाई राष्ट्रिय स्तरमा सम्मान दिलाउने अपेक्षा गरिएको छ । उनीहरूको यस सफलताले खेलकुद क्षेत्रको विकासमा मात्र नभई स्थानीय प्रतिभालाई राष्ट्रिय स्तरमा पुर्‍याउन पनि महत्त्वपूर्ण भूमिका खेल्नेछ ।

वीरगञ्ज र सम्पूर्ण मधेस प्रदेशले आफ्नो खेलाडीहरूको सफलताका लागि शुभकामना व्यक्त गरेका छन् ।