वासिङ्टन डीसी । अमेरिकाको लस एन्जलसमा जङ्गलमा भएको आगलागीमा मर्नेको संख्या पाँच पुगेको छ । लस एन्जलस शेरिफको कार्यालयले मृत्युको पुष्टि गरेको हो । यसअघि अधिकारीहरूले दुई जनाको मृत्युको पुष्टि गरेका थिए । दुवै मृत्यु अल्टाडेना क्षेत्रमा रहेको इटनमा आगलागीका कारण भएको बताइएको छ ।

लस एन्जलस काउन्टी अग्नि नियन्त्रक प्रमुख एन्थोनी म्यारोनका अनुसार इटनको आगो अहिले १० हजार ६०० एकडसम्म फैलिएको छ । यो अझै नियन्त्रणमा आएको छैन ।

‘दुर्भाग्यवश पाँच जनाको मृत्यु भएको छ र केही घाइते भएका छन् । अहिलेसम्म एक हजारभन्दा बढी घर र भवनहरू क्षतिग्रस्त भएका छन् वा पूर्ण रूपमा ध्वस्त भएका छन् ।’ उनले भने ।

एरिजोना सहित क्यालिफोर्निया बाहिरका अधिकारीहरू अग्नि नियन्त्रकहरूलाई सहयोग गर्न आएको पनि उनले बताए । आगलागीलाई हेरेर लस एञ्जलसमा आपत्काल घोषणा गरिएको छ । सर्वसाधारणहरूलाई सतर्क रहन चेतावनी दिइएको छ ।