भारत। भारतको उत्तर प्रदेश राज्यको राजधानी लखनउमा आफ्नो आमा र चार जना बहिनीको हत्या गरेको आरोपमा एक २४ वर्षीय युवक पक्राउ परेका छन् । लखनउस्थित एक होटेलको कोठामा आमा र बहिनीहरूको हत्या गरेको आरोपमा अर्षद नाम गरेका युवकलाई प्रहरीले नियन्त्रणमा लिएको हो । अर्षदले परिवारभित्रका विवादलाई हत्या गर्ने कारण बताउँदै आफ्नो अपराध समेत स्वीकार गरेको प्रहरीको भनाइलाई उद्धृत गर्दै भारतीय सञ्चारमाध्यमहरूले जनाएका छन् ।
प्रहरीका अनुसार लखनउको थाना नाका क्षेत्रस्थित होटेल शरणजीतको कोठामा ४२ वर्षीय आमा अस्मा र उनकी छोरीहरू ९ वर्षीय आलिया, १९ वर्षीय अल्सिया, १६ वर्षीय आक्सा र १८ वर्षीय रहमिनको शव बुधवार बिहान होटेलका कर्मचारीले फेला पारेका थिए । शव फेला परेपछि होटेल व्यवस्थापनले तुरुन्तै स्थानीय प्रहरीलाई खबर गरेको थियो ।
घटनाबारे पुष्टि गर्दै डीसीपी रवीना त्यागीले थाना नाका क्षेत्रमा होटेलको कोठामा पाँच शव फेला परेको जानकारी दिएकी छन् । स्थानीय प्रहरी घटनास्थलमा पुगेर अनुसन्धान सुरु गरेको उनले जानकारी दिएकी छन् ।
प्रहरीका अनुसार आग्राको इस्लाम नगर, तेड़ी बगिया, कुबरपुरका बासिन्दा अर्षदले आफ्नी आमा र बहिनीहरूलाई ब्लेड प्रयोग गरी हत्या गरेका हुन् । प्रारम्भिक अनुसन्धानमा उनले पहिले आमा अस्माको हत्या गरेको र त्यसपछि एक-एक गरेर बहिनीहरूको हत्या गरेको खुल्न आएको छ ।
यद्यपि होटेलका अन्य पाहुनाहरूले रातभर कुनै असामान्य आवाज नआएको बताएका छन् । यस्तो हिंसात्मक घटना कसरी भयो भन्ने कुराले सबैलाई आश्चर्यचकित बनाएको छ ।
प्रहरीले घटनास्थललाई सिल गरेर फरेन्सिक प्रमाण सङ्कलन गरेको छ भने वरिष्ठ प्रहरी अधिकारीहरूले पनि स्थल निरीक्षण गरेका छन् । पाँचै जनाको शवलाई मृत्युको सही कारण पत्ता लगाउन पोस्टमार्टमका लागि पठाइएको छ ।
प्रहरीको अनुसन्धानको क्रममा अर्षदले आमा बाहिनीहरूलाई मारेको स्वीकार गरेका छन् । उनले परिवारभित्र भइरहेका विवादहरूले आफूलाई मानसिक दबाबमा पारेको र सोही कारणले हत्या गरेको बताएका छन् ।
“२४ वर्षीय अर्षदलाई नियन्त्रणमा लिइएको छ । प्रारम्भिक अनुसन्धानबाट पारिवारिक समस्याका कारण उनले आमा बाहिनीहरूको हत्या गरेको देखिएको छ । घटना सम्बन्धी थप अनुसन्धान भइरहेको छ,” डिएसपी त्यागीले भनिन् ।
परिवारभित्रको तनावले यस्तो नृशंस अपराधलाई निम्त्याएको प्रहरीको दाबी छ । अपराधका पछाडिका थप कारणहरू पत्ता लगाउन प्रहरीले अनुसन्धानलाई तीव्र बनाएको छ ।
