वीरगञ्ज । सखुवा प्रसौनी गाउँपालिका–१, दोहरी गाउँका स्थानीय समस्याहरू र गाउँपालिकाको गतिविधिबारे छलफल गर्न नेकपा माओवादी केन्द्रका नेता शिवकुमार साह आज स्थानीयहरूसँग प्रत्यक्ष संवादमा सहभागी भए।

छलफलका क्रममा स्थानीयहरूले गाउँमा रहेका विभिन्न समस्याहरू उजागर गरे। विशेष गरी, यो टोल गाउँपालिकाको अन्तर्गत रहे पनि पर्सागढी नगरपालिकाको बाटो प्रयोग गर्नुपर्ने बाध्यता रहेको बताइयो। अन्डवा खोलामा पुलको अभावले गाउँपालिकाको आफ्नै बाटोबाट आवतजावत असहज भइरहेको उल्लेख गरियो।

स्थानीयहरूले शिक्षाको अवस्था कमजोर भएको पनि औंल्याए। टोलमा रहेको प्राथमिक विद्यालयमा १ स्थायी शिक्षकसहित जम्मा चार जना शिक्षक कार्यरत रहेकाले पठनपाठन प्रभावकारी हुन नसकेको गुनासो गरिएको छ।

जमुनीया खोलाको कारणले वार्डहरू प्रभावित हुने समस्यालाई पनि छलफलमा उठाइएको थियो। जनप्रतिनिधिहरूले आफ्नो स्वार्थका लागि ५ करोडको टेन्डर ६५ लाखमा पटेर्वा सुगौली गाउँपालिकालाई हस्तान्तरण गरेको भन्दै स्थानीयहरूले गम्भीर असन्तोष व्यक्त गरे।

छलफलपछि नेता साहले समस्या रहेका स्थानहरूको स्थलगत अवलोकन गरे। उनले समस्या समाधानका लागि आफू र आफ्नो पार्टीको तर्फबाट पहल गर्ने र आवश्यकता परेमा उच्च तहका नेताहरूलाई जानकारी गराई समाधानका लागि दबाब दिने प्रतिबद्धता जनाए।

कार्यक्रममा माओवादी नेताहरू प्रदीप चौधरी, पारसनाथ साह, हटन चौधरी, हरिलाल राम, अन्य राजनीतिक दलका नेता-कार्यकर्ताहरू, र स्थानीय व्यक्तित्वहरू रामजनम पटवारी, दीपनारायण महतो, धर्मराज पटवारी, प्रदीप दास थारु लगायतको उपस्थिति रहेको थियो।

स्थानीय समस्याहरू समाधान गर्न सबै पक्षबाट समन्वय र प्रयास गरिनुपर्ने स्थानीयहरूको धारणा रहेको छ।