वीरगंज | विश्वप्रसिद्ध पञ्चवर्षीय गढीमाई मेला शनिबारदेखि बाराको बरियापुरस्थित गढीमाई मन्दिरमा सुरु भएको छ। मेलाको सुरुवातसँगै नेपाल, भारतलगायत अन्य देशबाट भक्तजनहरूको भीड बढ्न थालेको छ।
करीब १ हजार बिगाह क्षेत्रफलमा फैलिएको यो मेलामा एक महिनाभरमा करिब १ करोड भक्तजन सहभागी हुने गढीमाई मेला व्यवस्थापन समितिले जनाएको छ। मेलाको पहिलो दिन विशेष पूजा सम्पन्न भएको छ। मंसिर २३ गते मुख्य दिनको पूजा अन्तर्गत तान्त्रिक विधिबाट गढीमाईलाई पञ्चबलि दिने परम्परा रहेको छ। मूल पुजारी मंगल चौधरीका अनुसार यस क्रममा मन्दिरमा भाकल गरिएका पशुहरूको बलि दिइन्छ।
मंसिर २३ गते राँगाको बलि हुने र त्यसपछिका दिनमा बोका, हाँस, परेवा र कुखुराको बलि दिने परम्परा रहेको गढीमाई मेला मूल आयोजक समितिले जानकारी गराएको छ।
मेलामा भक्तजनहरूको सहजताका लागि व्यापक तयारी गरिएको छ। स्वास्थ्य सेवा उपलब्ध गराउन १० वटा शिविर सञ्चालनमा छन्, जसमा भेन्टिलेटर सुविधा पनि छ। आपतकालीन अवस्थामा सहयोग गर्न १० वटा एम्बुलेन्स र १० वटा वारुण यन्त्र तयारी अवस्थामा राखिएको समितिले जनाएको छ।
गढीमाई मेला धार्मिक आस्था र सांस्कृतिक परम्पराको प्रतीक मानिन्छ। मेलाको अवसरमा आउने भक्तजनहरूको भीडले यस क्षेत्रको सांस्कृतिक महत्त्व र पर्यटकीय आकर्षणलाई थप उजागर गर्ने विश्वास गरिएको छ।
