रौतहट । रौतहटको टिकुलियास्थित लालबकैया नदीमाथि निर्माणाधीन पक्की पुल १४ वर्ष बितिसक्दा पनि अधुरो छ। पुलको काम नबन्दा गौर र इशनाथ नगरपालिकाका स्थानीयले अझै पनि कच्ची वैकल्पिक बाटो प्रयोग गर्न बाध्य छन्। नगरपालिकाले ह्युम पाइप राखेर अस्थायी डाइभर्शनमार्फत नदी पार गर्न सजिलो बनाएको भए पनि यात्रुहरू पक्की पुल नहुँदा लामो घुमाउरो बाटो वा जोखिमपूर्ण कच्ची बाटोमा निर्भर छन्।

स्थानीयले वर्षायाममा डुङ्गा प्रयोग गर्नुपर्ने अवस्था आउँदा कठिनाइ भोग्दै आएका छन्। गौरका सेवा सुविधा लिन आउनुपर्ने बन्जराहा, औरैया र मठिया क्षेत्रका बासिन्दाहरूले लामो समयदेखि पुल निर्माणको पर्खाइमा छन्।

२०७१ सालमा तत्कालीन प्रधानमन्त्री सुशील कोइरालाले पुलको शिल्यान्यास गरेका थिए। सुरुमा पप्पु कन्स्ट्रक्सनले १४ करोड ९२ लाख रुपैयाँमा ठेक्का लिएको यो पुल १० वर्षपछि पनि सम्पन्न हुन सकेन। कालोसूचीमा परेपछि अर्को ठेकेदार कम्पनी आजाद दिपु जेभीले २७ करोडमा ठेक्का पायो, तर बजेट अभावका कारण यो कम्पनीले पनि पुलको काम अघि बढाउन सकेको छैन। डिभिजन सडक कार्यालय रौतहटका इन्जिनियर अशोक यादवका अनुसार, हालसम्म पुलको करिब ५० प्रतिशत मात्र काम सम्पन्न भएको छ, र बजेट अभावकै कारण काम रोकिएको छ।

पक्की पुल नहुँदा २०७५ सालमा सोही स्थानमा डुङ्गा दुर्घटनामा पाँच जनाको मृत्यु भएको थियो। जोखिमपूर्ण यात्रा र लामो दूरीको कच्ची बाटोको विकल्प अन्त्य गर्न पक्की पुल निर्माण चाँडो सम्पन्न होस् भन्ने यात्रुहरूको अपेक्षा रहेको छ।

पुल निर्माणमा निरन्तर ढिलाइ हुँदा स्थानीय बासिन्दाहरूको दैनिकीमा कठिनाइ बढेको छ। खासगरी वर्षायाममा नदीको बहाव बढ्ने हुँदा अस्थायी डाइभर्शन समेत जोखिमपूर्ण बन्छ। स्थानीय किसान जयन्ती माला लगायतका बासिन्दाहरूले पुल नहुँदा गौरसम्मको यात्रा समय, लागत र सुरक्षाका दृष्टिले चुनौतीपूर्ण भएको बताउँछन्।

गौर क्षेत्रका व्यापारिक गतिविधिमा पनि पुलको अभावले प्रत्यक्ष असर पुर्‍याएको छ। गौर बजारसँग जोडिनका लागि सहज र छोटो मार्ग नहुँदा व्यापारीहरूले सामान ढुवानी गर्दा अतिरिक्त खर्च र समय खर्चिनुपरेको गुनासो गरेका छन्। अस्थायी बाटो हिलो हुने, यात्राका साधनहरू बिग्रिने, तथा दुर्घटनाको जोखिम बढ्ने समस्या स्थानीयले बारम्बार उठाएका छन्।

प्रशासकीय अधिकृत नन्दकिशोर गुप्ताका अनुसार, वैकल्पिक मार्गबाट दैनिक यात्रा गर्नुपरेको कठिनाइलाई दृष्टिगत गर्दै पक्की पुल निर्माण कार्यलाई प्राथमिकतामा राख्न सम्बन्धित मन्त्रालयलाई आग्रह गरिएको छ। उनले बजेटको अस्थायीत्वले पुल निर्माणको गति प्रभावित भएको र यसले स्थानीयहरूमा निराशा थपेको बताए।

पक्की पुलले गौर क्षेत्रको यातायात, व्यापार र सर्वसाधारणको आवागमनलाई सहज बनाउने भएकाले यथाशिघ्र यसको निर्माण कार्यलाई सम्पन्न गर्न स्थानीय समुदायले सरकारसँग जोडदार माग गरेका छन्। लामो प्रतीक्षापछि पुलको काम सम्पन्न हुने आशा गर्दै स्थानीयले दवाव बढाइरहेका छन् ताकि अविलम्ब यो समस्या समाधान होस् र उनीहरूले सुरक्षित र छिटो यात्रा गर्न सकून्।