वीरगंज | पर्सा जिल्लाको ठोरी गाउँपालिकाका किसानहरूले भदइ, मंसुली र चैते धान भित्र्याएपछि खाली खेतमा तोरी छर्ने र सुर्ती रोप्ने कार्य सुरु गरेका छन्। ठोरी गाउँपालिका वडा नं.–५ सुवर्णपुरका किसान हरिबहादुर चौंलागाईंका अनुसार, धानबाली भित्र्याइएपछि अहिले तोरी र सुर्तीका लागि खेत तयारी भइसकेको छ। किसानहरूले कार्तिक महिनाको पहिलो सातामै रोपाइँको तयारी गरेका भए पनि कात्तिक ५ गते परेको वर्षाका कारण रोपाइँमा ढिलाइ भएको बताइएको छ।
कतिपय किसानहरूले वर्षाका कारण केही सुर्तीबाली नष्ट भए पनि अहिले जमिनमा चिसोपन पर्याप्त भएकाले तोरी छर्न थालेका छन्। कृषि ज्ञान केन्द्र पर्साका अनुसार, जिल्लामा सबैभन्दा बढी तोरी उत्पादन ठोरी गाउँपालिकामा हुने गरेको छ। तोरी तीन महिनामा भित्र्याइने तेलहन बाली हो, जसले किसानलाई आर्थिक रुपमा लाभ पुर्याउँछ।
त्यस्तै, नगदेबाली अन्तर्गत पर्ने सुर्तीको रोपाइँ पनि अहिले धमाधम भइरहेको छ। जिराभवानी गापा वडा नं.–४ सुपौलीका किसान रामराज दासका अनुसार, गत वर्षको तुलनामा यस वर्ष सुर्ती खेतीको क्षेत्रफल बढाइएको छ। गत वर्ष ५२ वटा बिउ उत्पादनका ब्याडहरू थिए भने यस वर्ष ७४ वटा ब्याडमा बिउ उत्पादन भइरहेको छ।
किसानहरूले उत्पादन गरेको सुर्ती खरिद गर्ने कम्पनी सूर्य नेपालले बार्ली जातको सुर्ती लगाउन सिफारिस गरेको छ। ठोरी, जिराभवानी, पटेर्वासुगौली, सखुवाप्रसौनी लगायतका गाउँपालिकाका किसानहरू सुर्ती रोपाइँमा व्यस्त छन्। बार्ली र एचडी जातका सुर्ती खेती गरिने यस क्षेत्रमा बार्ली सुर्तीको मूल्य महँगो भए पनि उत्पादन कम हुन्छ भने एचडी जातको मूल्य थोरै भए पनि उत्पादन बढी हुने किसानहरूले बताएका छन्।
पर्सामा करिब एक हजार हेक्टर जमिनमा सुर्ती खेती गरिन्छ, र नेपालमा सबैभन्दा बढी सुर्ती उत्पादन यही क्षेत्रमा हुने गर्दछ। किसानहरूले यसबाट १५ हजारदेखि २५ हजार रुपैंयासम्मको आम्दानी गर्ने गर्छन्।
