वीरगंज | नेपालका खानेपानीमन्त्री प्रदीप यादव र भुटानका ऊर्जा तथा प्राकृतिक स्रोत मन्त्री ल्योन्पो जेम छिरिङबीच आज शिष्टाचार भेटवार्ता सम्पन्न भएको छ। ‘इन्टरनेसनल सेन्टर फर इन्टिग्रेटेड माउन्टेन डेभलपमेन्ट’ द्वारा आयोजित दोस्रो हिन्दूकुश हिमालय मन्त्रीस्तरीय शिखर सम्मेलनमा भाग लिन नेपाल आएका मन्त्री छिरिङले सिंहदरबारस्थित मन्त्रालयमा मन्त्री यादवसँग विभिन्न विषयमा विचार-विमर्श गर्नुभएको हो।
भेटका क्रममा मन्त्री यादवले नेपाल र भुटानबीच प्राचीन सामाजिक-सांस्कृतिक सम्बन्ध रहेको उल्लेख गर्दै हिमाली भूगोल, विकास चुनौती, र जलवायु परिवर्तनजस्ता साझा मुद्दाहरूमा सहकार्यको सम्भावना रहेको बताउनुभयो। उहाँले दुवै देशले पानी प्रशोधन र ढल व्यवस्थापनका प्रविधिहरू आदानप्रदान गर्न सक्ने बताउँदै पानीको गुणस्तर अनुगमन र प्रदूषण नियन्त्रणमा संयुक्त कार्यक्रम सञ्चालन गर्नुपर्नेमा जोड दिनुभयो।
यस्तै, ग्रामीण क्षेत्रमा सौर्य ऊर्जाबाट चल्ने पानी प्रशोधन प्रणाली र कम लागतका प्रविधिहरू प्रवर्द्धन गर्न नेपाल–भुटान सहकार्यको महत्व रहेको उहाँले औँल्याउनुभयो। भुटानले वातावरणमैत्री ढल व्यवस्थापनमा गरेको प्रगतिलाई सराहना गर्दै उहाँले यसलाई नेपालमा पनि भित्र्याउन सकिने विचार राख्नुभयो।
भुटानी मन्त्री छिरिङले नेपाल र भुटानबीचको व्यापार सिधा गर्नुपर्नेमा जोड दिँदै भारत हुँदै व्यापार गर्दा लागत बढ्ने समस्या रहेको बताउनुभयो। साथै, भुटानी चामल र आलुको लोकप्रियतामा सिधा व्यापारले सहयोग पुर्याउने उल्लेख गर्नुभयो। धार्मिक पर्यटनमा भुटानी नागरिकको नेपाल भ्रमण सहज बनाउनुपर्ने कुरा पनि उहाँले उठाउनुभयो। मन्त्री यादवले जलविद्युत्, पर्यापर्यटन, र स्वच्छ पानी व्यवस्थापनमा भुटानसँग सहकार्यको प्रस्ताव राख्दै भुटानको सफल विकास यात्रा नेपालका लागि प्रेरणा बन्ने विश्वास व्यक्त गर्नुभयो।
भेटको क्रममा मन्त्री यादवले भुटानको अनुभवबाट नेपालले धेरै सिक्न सक्ने उल्लेख गर्दै, दिगो विकास र जलस्रोत व्यवस्थापनमा भुटानले हासिल गरेको सफलताले नेपालको विकास प्रक्रियामा पनि सकारात्मक प्रभाव पार्न सक्ने बताउनुभयो। उहाँले जलविद्युत् उत्पादन र वितरणका क्षेत्रमा भुटानसँग प्राविधिक ज्ञान र अनुभव आदानप्रदान गर्न तयार रहेको जानकारी दिनुभयो।
भुटानी मन्त्री छिरिङले नेपाल र भुटानबीचको सांस्कृतिक, धार्मिक, र पर्यावरणीय सम्बन्धलाई अझ सुदृढ बनाउन सहकार्य आवश्यक रहेको औंल्याउनुभयो। उहाँले नेपाल भ्रमणलाई भुटानी नागरिकका लागि आकर्षक बनाउन केही नीतिगत सुधार गर्नुपर्ने सुझाव दिनुभयो, जसले धार्मिक पर्यटनमा समेत वृद्धि गर्न सक्ने विश्वास व्यक्त गर्नुभयो।
दुवै मन्त्रीले भविष्यमा जलस्रोत, स्वच्छ ऊर्जा, र वातावरणीय संरक्षणजस्ता महत्वपूर्ण क्षेत्रमा दुई देशबीचको सहकार्यलाई थप विस्तार गर्नुपर्नेमा सहमति जनाउनुभयो। मन्त्री छिरिङले नेपाल र भुटानबीचको पर्यटन प्रवर्द्धन र जलविद्युत् विकासमा दीर्घकालीन सहकार्यको सम्भावना रहेको उल्लेख गर्दै भुटान भ्रमणको निम्तो दिनुभयो।
मन्त्री यादवले भुटानको अति कम विकसित राष्ट्रबाट सफलतापूर्वक स्तरोन्नति भएको यात्राका लागि भुटानी समकक्षीलाई बधाई ज्ञापन गर्दै, भुटानको विकास अनुभवले नेपाललाई नयाँ दिशा दिन सक्ने विश्वास व्यक्त गर्नुभयो। भेटघाट सकारात्मक वातावरणमा सम्पन्न भएको थियो, र यसले दुई देशबीचको मित्रता र सहकार्यलाई थप प्रगाढ बनाउन मद्दत गर्ने अपेक्षा गरिएको छ।
