बारा । किराना व्यापार संघले बारा उद्योग वाणिज्य संघको आगामी निर्वाचन बहिष्कार गर्ने निर्णय गरेको छ। सोमबार बसेको संघको बैठकले उम्मेदवारहरूको उम्मेदवारी फिर्ता लिँदै निर्वाचन बहिष्कार गर्ने निर्णय गरेको हो।

कोषाध्यक्ष पदका उम्मेदवार राजेश गुप्ता, सचिव पदका उम्मेदवार दिपलाल साह, र सदस्य पदका उम्मेदवार दिनदयाल साह, संजयकुमार पटेल, देव कुमार साह, शोभाकुमारी सर्राफ, अन्जनी कुमार साह, विशाल कुमार साह, र बाबु योगेन्द्र कुमारले उम्मेदवारी फिर्ता लिएका छन्।

संघका अध्यक्ष सुनिल कुमार साहका अनुसार, उद्योग वाणिज्य संघ बारा एक महत्वपूर्ण संस्था हो। तर, हालैका दिनमा संघका पदाधिकारीहरूले आक्रमण, अभद्र व्यवहार, र कुटपिट गरेको आरोप लगाउँदै निर्वाचन बहिष्कारको निर्णय गर्नुपरेको उल्लेख गरेका छन्। अध्यक्ष साहले भने, “हाम्रो संघको सदस्यलाई गालीगलौज र कुटपिटको सामना गर्नु परेको छ, जसले गर्दा हामीलाई यस्तो निर्णय लिन बाध्य बनायो।”

महासचिव पदका उम्मेदवार सन्तु साहको पसल अगाडि उम्मेदवारी फिर्ता लिने विषयमा छलफल भइरहँदा, उपाध्यक्ष पदका उम्मेदवार गोल्डेन प्रदीप साहले सचिव पदका उम्मेदवार दिपलाल साहमाथि आक्रमण गरेको आरोप लागेको छ।

संघले बारा उद्योग वाणिज्य संघमा वाणिज्यतर्फ ५७२ र उद्योगतर्फ ९२ जना मतदाता रहेको जानकारी दिएको छ। यस घटनाले बारा उद्योग वाणिज्य संघको आगामी निर्वाचनमाथि प्रश्नचिह्न खडा गरेको छ।