वीरगंज | काठमाडौंको सुन्धारास्थित नवनिर्मित धरहरा असोज ३ गतेदेखि अस्थायी रूपमा सञ्चालनमा ल्याइने भएको छ। बिहीबार बसेको मन्त्रिपरिषद् बैठकले संविधान दिवसको अवसर पारेर धरहरा सञ्चालन गर्ने निर्णय गरेको हो। एक मन्त्रीका अनुसार धरहराको सञ्चालनको जिम्मेवारी संघीय सरकारको शहरी विकास मन्त्रालयलाई दिइएको छ।

२०७२ सालको भूकम्पअघि संघीय सरकारले धरहरा सञ्चालनको जिम्मा काठमाडौं महानगरपालिकालाई दिएको थियो। महानगरपालिकाले एक निजी कम्पनीलाई ठेक्का दिएको थियो, तर मन्त्रिपरिषद् बैठकले यसअघिका सबै निर्णय खारेज गरेको छ।

नयाँ धरहराको बाहिरी स्वरूप पुरानै ११ तले देखिए पनि यसको भित्री संरचना २२ तलाको रहेको छ। धरहराको कुल उचाइ ८३.५८ मिटर रहेको छ। १९९० सालको भूकम्पअघि धरहरा ११ तला अग्लो थियो, तर दुई तला भत्किएर ९ तलामा सीमित भएको थियो।