वीरगंज । बुढानीलकण्ठमा घर घडेरी भएका धनी बाबुका छोरा हुन् आशिष देउला । ३३ वर्षका देउला अहिले दुई जना किशोरलाई बन्धक बनाएर विद्युतीय रडले डामेर यातना दिएको आरोपमा जिल्ला प्रहरी परिसर काठमाडौँको हिरासतमा छन् ।
बा७च ६४६१ नम्बरको पजेरोमा राखेर उनको समूहले भदौ ७ मा विशाल देउलालाई टेकुस्थित दोभान पुलबाट लगनटोलस्थित सलबालमा लगे । त्यहाँ पानी तताउने विद्युतीय रड तताएर आशिषले विशालको शरीरमा पोलिदिए । करिब ३ घण्टासम्म बन्धक बनाएर आशिषसहितका ४ जना मिलेर डामेको प्रहरीको अनुसन्धानबाट थाहा भएको छ ।
आशिषलाई विशालले ठमेलस्थित क्लब सिनेटमा चिनेका हुन् । विशालका अनुसार डामेपछि आशिषले ‘खुब मजा आयो’ भनेका थिए ।
लगनस्थित सलबालमा आफ्नै मामाको घरमा लगेर आशिषले विशाललाई यातना दिएका हुन् । तर, त्यस्तो क्रुर यातना दिँदा पनि आशिषका आफन्त केही बोलेनन् ।
बुढानीलकण्ठस्थित घरमा लगेर आशिषले निमा नाम गरेका अर्का किशोरलाई यातना दिएको अनुसन्धानबाट थाहा भएको छ । निमा र विशालले प्रहरीमा निवेदन दिएका छन् ।
धनी बाबुका छोरा आशिष रात्रि क्लबको नियमित ग्राहक हुन् । सिनेट, ओम्निया र एलओडीमा उनी निरन्तर जान्छन् । पीडित विशाल देउला भन्छन्, ‘मैले उहाँलाई सिनेटमा भेटेको हुँ ।’
क्लबमा भेट्ने युवायुवतीलाई ‘हाउस पार्टी’ गर्ने भनेर आशिषको समूहले बुढानीलकण्ठ र लगनमा लगेर यातना दिने गरेको थाहा भएको छ । देउलाको समूहमा २७ वर्षीय राजेन्द्र घले, उदयपुरका २२ वर्षीय ओजस्वी तामाङ र चितवन घर भएका २२ वर्षका साजन गुरुङ आबद्ध छन् । चारै जना अहिले थुनामा छन् ।
बुढानीलकण्ठमा युवा–युवतीलाई बन्धक बनाएको आरोपमा ४ जना पक्राउ
बुढानीलकण्ठमा युवा–युवतीलाई बन्धक बनाएको आरोपमा ४ जना पक्राउ
किशोरहरूलाई उनले किन यातना दिए भन्नेबारे अनुसन्धान भइरहेको जिल्ला प्रहरी परिसर काठमाडौँका एसपी नवराज अधिकारीले रातोपाटीलाई बताए । उनले भने, ‘यातना दिनुपर्ने कारण खोज्दै छौँ ।’
‘सुगर ड्याडी–५० मी’
आशिषले १२ कक्षा पास गरेका छन् । क्लबमा जाँदा उनी ३० देखि ४० हजार रुपैयाँ उडाउँछन् । अनुसन्धान अधिकृतहरूसँग उनले भनेका छन्, ‘हप्तामा ३ दिन क्लब जान्छु ।’
क्लबमा जाँदा उनी समय–समयमा नकाब लगाएर जान्थे । बुढ्यौली झल्किने नकाब लगाएर क्लबमा जाने र किशोर किशोरीलाई आकर्षित गर्ने गरेको अनुसन्धानमा संलग्न अधिकृत बताउँछन् ।
उनको ‘सुगर ड्याडी–५० मी’ नामको टिकटक आइडी छ । सो आइडीमा नकाब लगाएर उनले पैसा फालेको भिडियो देखिन्छ । पैसा उडाएको बारेमा अनुसन्धान अधिकृहरूसँग उनले भनेका छन्, ‘बैंकबाट ऋण लिएको पैसा उडाएर भिडियो बनाएको हुँ, त्यो मेरो सोख हो ।’
आशिषको परिवारमा दुई जना जुम्ल्याहा बच्चा र पत्नी छन् । उनले आरती एण्ड कम्पनी नामबाट प्रिफ्याव सम्बन्धी काम गर्ने कम्पनी सञ्चालन गरेको बताएका छन् । क्लबमा भेट भएका दुई जना किशोरले आफ्नो पैसा देखेर फसाउन खोजेको उनले अनुसन्धान अधिकृतहरूसँग बताएका छन् ।
आशिषले प्रहरीसँग भनेका छन्, ‘दुई जना किशोरले मलाई केटी प्रयोग गरेर फसाउँछु भनेर फोन गरेपछि त्यसरी डामेको हुँ ।’
