वीरगञ्ज । कृषि औजार कारखाना सञ्चालनको लक्ष्यका साथ वैज्ञानिक महावीर पुन आफ्नो जीवनीमा आधारित किताब बेच्दै देशभर यात्रा गरिरहेका छन्। बिहीबार बिहान उनी वीरगञ्जको घण्टाघरमा किताब बेच्न पुगे।
राष्ट्रिय आविष्कार केन्द्रका संस्थापक पुनले “महावीर पुन” नामक आफ्नो जीवनीमा आधारित पुस्तक प्रति किताब ७ सय रुपैयाँमा बिक्री गरिरहेका छन्। उनले अहिलेसम्म ७५ हजारभन्दा बढी किताब बेचिसकेको जानकारी दिए। किताब बिक्रीबाट संकलित रकम वीरगञ्जमा कृषि औजार कारखाना स्थापना गर्ने उद्देश्यमा प्रयोग हुनेछ।
पुनले सुदूरपश्चिमको महेन्द्रनगरबाट आफ्नो यात्रा सुरु गर्दै दाङ, बुटवल, चितवन, हेटौडा, बारा हुँदै वीरगञ्ज आइपुगेका हुन्। उनले भने, “यदि झन्डै तीन लाख मानिसले मेरो किताब किनिदिएमा करिब १६ करोड रुपैयाँ संकलन हुनेछ, जसले कृषि औजार कारखाना स्थापना गर्न पर्याप्त हुनेछ।”
पुनले आफू यस अभियानको अभियन्ता भएको र किताब किन्ने हरेक व्यक्ति कृषि कारखाना स्थापनाका हिस्सेदार हुने बताए। उनले भने, “देशका युवाहरू विदेश पलायन भइरहेका बेला उनीहरूलाई प्रेरित गर्नु आवश्यक छ। मेरो किताबमा जीवनका संघर्ष र सफलता, अमेरिका पढ्न जानेदेखि यहाँसम्मको यात्रा समेटिएको छ।”
उनको भनाइमा, यदि कृषि औजार कारखाना स्थापन गर्न सके, झन्डै ६ सय जनालाई रोजगारी मिल्नेछ। हाल नेपालमा आवश्यक कृषि औजारहरू भारत र चीनबाट आयात गरिन्छ। पुनको विचारमा नेपालमै उत्पादन गर्न थालेमा आयातको ६-७ प्रतिशत घट्न सक्ने र यो देशको लागि ठूलो उपलब्धि हुनेछ।
महावीर पुनले कृषि औजार कारखाना स्थापनाको अभियानलाई देशकै आत्मनिर्भरता र विकाससँग जोडेर हेरिरहेका छन्। उनका अनुसार, यदि नेपालमा नै कृषि औजार उत्पादन गर्न सकियो भने नेपाली कृषकहरूलाई सस्तो मूल्यमा औजार उपलब्ध हुनेछ, जसले देशको कृषि क्षेत्रको विकासमा महत्वपूर्ण योगदान पुर्याउनेछ।
उनले भने, “कृषिमा आधारित मुलुक भएर पनि हामी कृषि औजारका लागि विदेशी बजारमा निर्भर छौं। नेपालमै कारखाना खुलेपछि यसको लागत घट्ने मात्र होइन, कृषिमा उत्पादकत्व पनि वृद्धि हुनेछ।”
पुनले युवाहरूलाई स्वदेशमै केही गर्न प्रेरित गर्दै कृषि क्षेत्रलाई आधुनिक र आत्मनिर्भर बनाउनु आजको आवश्यकता रहेको बताए। उनले यो अभियानमा सबैले सघाउन र किताब किनेर आफ्नो योगदान दिन आग्रह पनि गरे।
उनको यो अभियानले वीरगञ्जका स्थानीय बासिन्दा र व्यवसायीहरूबीच पनि उत्साह जगाएको छ। धेरैले यो अभियानलाई समर्थन जनाउँदै पुनको प्रयासलाई प्रशंसा गरेका छन्।
महावीर पुनको यो यात्रा र किताब बिक्री अभियानले कृषि क्षेत्रमा आत्मनिर्भर बन्ने दिशामा ठूलो कदम चालिएको देखिन्छ। अबको चुनौती भनेको यस अभियानलाई थप व्यापक बनाउँदै आवश्यक स्रोतसाधन जुटाएर कारखाना स्थापना गर्नु हुनेछ।
