वीरगञ्ज । चौथो पटक प्रधानमन्त्री बनेका नेकपा एमालेका अध्यक्ष केपी शर्मा ओलीले प्रधानमन्त्रीमा नियुक्त भएपछिको पहिलो विदेश भ्रमण भारतबाट गर्न चाहनु भएको भए पनि भारतले औपचारिक निमन्त्रण नदिएपछि अब उहाँको पहिलो विदेश भ्रमण अमेरिका हुने पक्का भएको छ।

प्रधानमन्त्री ओली आगामी असोज ४ गते संयुक्त राष्ट्रसंघको महासभामा भाग लिन अमेरिका जाने कार्यक्रम रहेको छ। महासभामा उहाँले असोज १० गते सम्बोधन गर्ने तय भएको छ। परराष्ट्र मन्त्रालयले प्रधानमन्त्रीको अमेरिका भ्रमणको तयारी सुरु गरिसकेको छ।

यसअघि, भदौ १८ र १९ गते थाइल्याण्डको बैंककमा आयोजना हुने तय भएको बिमस्टेक शिखर सम्मेलन स्थगित भएपछि प्रधानमन्त्री ओलीको यो भ्रमण तालिका सार्वजनिक भएको हो।

प्रधानमन्त्री ओलीले भारतबाट औपचारिक निमन्त्रणको प्रतीक्षा गरिरहेका थिए र सम्भवतः भारतीय निमन्त्रण प्राप्त भएपछि मात्र अमेरिका जाने योजना बनाएका थिए। भारतीय प्रधानमन्त्री नरेन्द्र मोदीले ओलीलाई प्रधानमन्त्रीमा पुनः नियुक्त भएकोमा फोनमार्फत बधाई दिए पनि औपचारिक निमन्त्रण पठाएका छैनन्।

यसैबीच, परराष्ट्र मन्त्री आरजु राणाको नयाँ दिल्ली भ्रमणको क्रममा पनि प्रधानमन्त्री ओलीलाई औपचारिक निमन्त्रण आएको छैन। यद्यपि, मन्त्री राणाले भारतीय प्रधानमन्त्रीलाई नेपालको तर्फबाट औपचारिक निमन्त्रण दिइसकेकी छन्।

भारत भ्रमणको टुंगो नलागे पनि प्रधानमन्त्री ओलीको अमेरिका भ्रमणको मिति र कार्यक्रम सार्वजनिक भइसकेको छ। महासभामा सहभागी भइरहँदा उहाँले सार्क राष्ट्रका प्रमुखहरूसँग पनि भेटवार्ता गर्ने तयारी भइरहेको जनाइएको छ।

प्रधानमन्त्री ओलीको चाहना भारतबाट पहिलो विदेश भ्रमण गर्ने भए पनि हालसम्मको परिस्थितिले उहाँको पहिलो औपचारिक विदेश यात्रा अमेरिकाबाटै सुरु हुने देखिएको छ।