वीरगंज | स्वास्थ्य तथा जनसङ्ख्या मन्त्रालयले देशका थप पाँच प्रदेशमा क्यान्सर उपचार सेवा विस्तार गर्ने निर्णय गरेको छ। स्वास्थ्यमन्त्री प्रदीप पौडेलले बुधबार क्यान्सर उपचार सेवा विस्तारका लागि कार्यविधि २०८१ स्वीकृत गरेका हुन्।

मन्त्री पौडेलले गत असार ३१ गते पदभार ग्रहण गरेसँगै आफ्नो पहिलो निर्णयका रूपमा राष्ट्रिय क्यान्सर नियन्त्रण रणनीति २०२४–३० स्वीकृत गरेका थिए, जसले सातवटै प्रदेशमा क्यान्सरको परीक्षण तथा निदानको लक्ष्य लिएको छ। त्यसको एक महिनाभित्रै बुधबार कार्यविधि स्वीकृत भएको छ।

कार्यविधि स्वीकृत भएपश्चात्, चितवनको भरतपुर क्यान्सर अस्पताल, भक्तपुरको भक्तपुर क्यान्सर अस्पताल र नेपालगन्जको सुशील कोइराला प्रखर क्यान्सर अस्पतालले अन्य प्रदेशमा क्यान्सर उपचार सेवा उपलब्ध गराउने भएका छन्।

भक्तपुर क्यान्सर अस्पतालले कोशी प्रदेशको विराटनगर अस्पताल र मधेस प्रदेशको नारायणी अस्पताल, वीरगञ्जमा क्यान्सरसम्बन्धी विशेषज्ञ सेवा उपलब्ध गराउनेछ। यस्तै, बीपी कोइराला मेमोरियल क्यान्सर अस्पताल, भरतपुरले गण्डकी प्रदेशको पोखरा स्वास्थ्य विज्ञान प्रतिष्ठान, कर्णालीको सुर्खेत प्रादेशिक अस्पताल र सुदूरपश्चिमको सेती प्रादेशिक अस्पताल, धनगढीमा विशेषज्ञ सेवा उपलब्ध गराउनेछ।

यस निर्णयसँगै सातवटै प्रदेशमा क्यान्सर उपचारसम्बन्धी सेवा विस्तार हुने स्वास्थ्य तथा जनसङ्ख्या मन्त्रालयका प्रवक्ता डा. प्रकाश बुढाथोकीले जानकारी दिए।

मन्त्री पौडेलले आइतबार सार्वजनिक गरेको प्राथमिकता तथा योजनामा सातै प्रदेशमा क्यान्सर रोग उपचार सेवा विस्तार गरिने उल्लेख गरेका थिए। त्यसको परिणामस्वरूप बुधबार मन्त्रीस्तरीय निर्णयमार्फत यससम्बन्धी कार्यविधि स्वीकृत भएको हो।

‘आम नागरिकले सहज तरिकाले क्यान्सर उपचार सेवा पाउने गरी यसको विस्तार गर्ने हाम्रो नीति हो, यसै अनुरुप बिस्तारको कार्यलाई प्राथमिकतामा राखेर काम गरेका हौँ,’ मन्त्री पौडेलले भने, ‘संघीय अस्पतालको सेवा विस्तारसँगै अब आम नागरिकको क्यान्सर उपचार सेवा पहुँच सहज हुने विश्वास लिएको छु।’

मन्त्रालयको नीति योजना तथा अनुगमन महाशाखा प्रमुख डाक्टर कृष्ण पौडेलले अब बिरामीहरूले संघीय क्यान्सर अस्पतालको सेवा नै विस्तारित अस्पतालबाट पाउने भएकाले खर्च र समय दुवै बचत हुने बताए। साथै, स्याटेलाइट क्लिनिक र दक्ष जनशक्तिको व्यवस्थापन गरी विस्तारित अस्पतालमार्फत सेवा प्रदान गरिने र यो प्रक्रिया प्रभावकारी हुने विश्वास व्यक्त गरे।

अहिले संघ मातहतका तीन अस्पतालले मात्र क्यान्सर उपचार सेवा उपलब्ध गराउँदै आएका छन्। कार्यविधि स्वीकृत भएसँगै ती अस्पतालहरूले देशका अन्य अस्पतालमा पनि क्यान्सर उपचार सेवा उपलब्ध गराउन प्रक्रिया सुरु गर्नेछन्।