वीरगञ्ज । नेपाल राष्ट्रवाद संघ केन्द्रीय कार्यालय वीरगञ्जले पूर्व नवयुवराज हृदयेन्द्र वीर विक्रम शाहको २२ औं जन्मदिन भव्यताका साथ मनाएको छ। यस अवसरमा वीरगञ्ज स्थित घण्टाघर चोकबाट संघका केन्द्रीय अध्यक्ष जनकलाल शाहको नेतृत्वमा बाजा सहित निस्किएको र्याली विभिन्न स्थानहरुमा पुगेको थियो।
र्यालीमा सहभागीहरूले “राजा आउ देश बचाउ”, “हाम्रो राजा हाम्रो देश प्राण भन्दा प्यारो छ”, “नेता चोर देश छोर”, “सङ्घीयता खारिज गर”, “हिन्दु राष्ट्र कायम गर” जस्ता नाराहरु लगाएका थिए। र्याली माईस्थान, महाविरस्थान, आदर्शनगर, अलखियामठ, घडिअर्वा माईस्थान हुँदै पुनः घण्टाघर चौकमा आइ समाप्त भएको थियो।
जन्मदिन समारोहमा सहभागीहरूले पूर्व नवयुवराज हृदयेन्द्रको तस्वीरमा पुष्प माल्यार्पण गरी उहाँको सु-स्वास्थ्य, दीर्घायु एवं उज्जवल भविष्यको कामना गरेका थिए।
कार्यक्रममा संघका पर्सा जिल्ला अध्यक्ष संगीता देवी शाह, उमाशंकर प्रसाद, पृथ्वी झा, संतोष गुप्ता, बिसनु कुमार दास, हरेराम रौनियार, पवन प्रसाद साह, दिपनारायण यादव लगायतको सहभागिता रहेको थियो। यसरी हर्षोल्लासका साथ मनाइएको जन्मदिन समारोहले पूर्व नवयुवराजप्रतिको जनसमर्थन र सम्मानको झल्को दिएको छ।
