विराटनगर । मिटरब्याजीको आरोप लागेका विराटनगर ७ का एक व्यक्तिले १२ वर्षमा मोरङ जिल्लामा मात्रै २९ कित्ता जग्गा जोडेको पाइएको छ । जसको मूल्य करोडौं रुपैयाँ पर्छ । मोरङ कटहरी गाउँपालिका २ घर भई हाल विराटनगर महानगरपालिका ७ स्थायी बसोबास भएका ५३ वर्षीय सञ्जयकुमार करवाले १२ वर्षमै करोडौं रुपैयाँको सम्पत्ति जोडेका हुन् । उनको यो सम्पत्ति आर्जन अस्वाभाविक देखिन्छ ।

मिटरब्याजमा पैसा लगानी गर्ने र दर्जन बढीलाई उठिबास लगाएको आरोप करवालाई लाग्ने गरेको छ । जिल्ला प्रशासन कार्यालय मोरङ स्रोतले पनि मिटरब्याजको एक नम्बर लगानीकर्ता उनै करवा भएको निष्कर्ष निकालेको छ । ‘विराटनगरका अशोक साहले धेरैलाई मिटरब्याजमा पैसा लगाएर पीडित बनाएको छ । सानातिना मानिसहरूको घर जग्गा उसले हडपेको देखिन्छ,’ जिल्ला प्रशासन कार्यालयका एक अधिकारीले भने, ‘विराटनगरकै मिटरब्याजको धन्दामा लागेका अर्का व्यक्ति हुन् सञ्जयकुमार करवा । यी मान्छे खतरनाक छन् ।’

करवाले विराटनगर महानगरपालिकाभित्र मात्रै १२ वर्षमा १३ कित्ता जग्गा जोडेका छन् । उनको कटहरी र विराटनगरमा पनि घर रहेको छ । भूमिसुधार तथा मालपोत कार्यालय विराटनगरका अनुसार उनको नाममा मोरङ जिल्लाभरी २९ कित्तामा ३ बिघा १८ कट्ठा १६.३६ धुर जग्गा देखिएको छ । उक्त जग्गा विराटनगर, कटहरी, सुनवर्षी नगरपालिका भित्र करोडौं रुपैयाँ पर्ने जग्गा छन् ।

उनले यति जग्गा जोडेको २०६६ साउन ८ गतेदेखि २०७८ चैत ८ गतेसम्ममा हो । त्यसअघि र त्यसयताको विवरण भने यहाँ उल्लेख गरिएको छैन । २०६६ साउन ८ गते एकै दिन उनले कटहरीको कित्ता नम्बर ४१४, ४१७, ४९ र ५० का जग्गा राजीनामा पास गराएर आफ्नो नाममा ल्याएका छन् । यस्तै २०७० जेठ १६ गते उनले एकै दिन मोरङको जतुवामा रहेको कित्ता नम्बर २६८, २६९, २७०, २८०, २७९, २१३ नम्बरकाका जग्गा आफ्नो नाममा ल्याएको देखिन्छ । यस्तै २०७१ साल जेठ ७ गते तीन वटा कित्ता तथा २०७८ चैत ८ गते एकै दिन तीनवटा कित्ता उनले आफ्नो नाममा ल्याएका छन् ।

ऋणका लागि राजीनामा, फिर्ता आएन

रिना कुमारी बहरदारको नाममा रहेको सुनवर्षी नगरपालिका ४ को साबिक कित्ता नं. ६५२, ६३८, ६४२, ६७३, ६४८ र विराटनगर ८ मा रामकाजी दासकी श्रीमती नुतन कुमारी दासको नाममा रहेको ३६०९ कित्ता नम्बरको २ बिघा जग्गा करवाले २०६८ मङ्सिर १६ गते एकै दिन राजीनामा पास गर्न लगाए । त्यसबाहेक पनि करवाले सोही दिन टकुवा मोरङको कित्ता नं. ३५ को जग्गा पास गराएको रेकर्डमा देखिन्छ ।

रिनाका श्रीमान् जगेन्द्र बहरदार र रामकाजी दासले घर व्यवहार मिलाउन भन्दै २०६८ सालमा करवाको नाममा २ बिघा जग्गा राजीनामा पास गराएर चार लाख १० हजार रुपैयाँ ऋण लिएका थिए । तीन रुपैयाँ ब्याजले लिएको ऋण उनीहरुले २०७३ सालसम्ममा करवालाई ३२ लाख रुपैयाँ बुझाए । करवाले अझै ३६ लाख दिएमात्रै जग्गा फिर्ता गरिदिने बताउँदै आएका छन् ।

‘चार लाखको ब्याज र सावा गरेर ३६ लाख भन्दा बढी रकम करवालाई बुझाइसक्यौँ । अझै ३६ लाख दिएपछि मात्रै जग्गा फिर्ता दिन्छु भन्दै आएका छन् । हामीसँग भएको सबै पैसा बुझाइसक्यौँ । तर, करवासँग लिएको ऋण अझै सकिएको छैन,’ राजेन्द्रले भने, ‘जग्गा फिर्ताको लागि धेरै ठाउँमा गएर हारगुहार गरिसक्यौं । तर, कतैबाट सुनवाइ भएको छैन ।’

करवाको मिटरब्याजको जालोमा परेर बिचल्लीमा परेका अर्का पीडित हुन् विराटनगर–१० का ६४ वर्षीय गजेन्द्रप्रसाद साह । १४ वर्ष अगाडि लिएको २५ लाखको ब्याज १ करोड १२ लाख रुपैयाँ तिरिसक्दा पनि अझै ३ करोड रुपैयाँ मागेपछि उनी बिचल्लीमा परेका छन् । मिटरब्याजीले भनेजति पैसा नदिएपछि उनको घर खाली गर्न उर्दि आउने गरेको छ । करवासँग उनले विराटनगर १० मारहेको कित्ता नं. १३३७-६९५ को १ कट्ठा साढे १८ धुरमा बनेको एक तले घर अनिता कुमारी साहको नाममा राजीनामा गरेर १२ असोज २०६७ मा २५ लाख रुपैयाँ लिएका थिए ।

२५ लाखको ब्याज र सावा गरी उनले अहिलेसम्म १ करोड १२ लाख रुपैयाँ बुझाइसकेको दाबी गर्छन् । अझै ३ करोड रुपैयाँ करवाले माग्ने गरेको उनको भनाइ छ । साहको उक्त जग्गा र घर अहिले अनिता कुमारीको नामबाट करवाको नाममा सरेको छ । करवाले भने अनिता कुमारी साहसँग जग्गासहितको घर २६ लाख ११ हजार रुपैयाँ खरिद गरेको बताउने गरेका छन् ।

‘ऋण तिर्दातिर्दै भएको सम्पत्ति सबै रित्तियो । तर ऋण अझै बाँकी छ भन्न साहुले कहिल्यै छोडेनन्,’ पीडित साहले भने, ‘२५ लाख ऋण लिएको हो । अहिलेसम्म १ करोड १२ लाख तिर्दासमेत ऋण चुक्ता भएन ।’

जिल्ला प्रशासन कार्यालय मोरङमा मिटरब्याजका ९९८ वटा निवेदन परेका छन् । अहिलेसम्म १०३ वटा निवेदनको मात्रै सुनुवाइ भएको छ । जसमा विराटनगरका मात्रै मिटरब्याजी विरुद्धका निवेदन २ सय ८६ वटा छन् । यस्तै मोरङको सुनवर्षी, रंगेली, जहदा र ग्रामथान गाउँपालिकाका मिटरब्याजीले ठगेको निवेदनहरू पनि उल्लेख्य छन् ।
ताकेता गरेर हैरान बनाएपछि उनले २०७९ जेठ ५ गते जिल्ला प्रशासन कार्यालय मोरङमा कावरविरुद्ध मिटरब्याजमा उजुरी दिएका छन् । सो उजुरी अहिले विचाराधीन छ । चलनचल्तीको ऋण भनेर लिएको रकम अहिले बल्ल आफू ‘मिटर ब्याज’को जालोमा जेलिएको थाहा पाएको बताए ।

अकुत सम्पत्ति आर्जन गरेको उजुरी परे प्रहरी थप अनुसन्धान गरेर सम्पत्ति शुद्धीकरण विभागलाई पत्राचार गर्न सकिने मोरङ प्रहरीका प्रवक्ता डिएसपी ज्ञानेन्द्र बहादुर बस्नेतले जानकारी दिए । ‘प्रमाण सङ्कलन गरेर थप कारबाहीको लागि सम्पत्ति शुद्धीकरण विभागमा पठाउन सकिन्छ,’ उनले भने । यता सञ्जयकुमार करवाले मिटरब्याजमा आफूले लगानी नगरेको दाबी गरे । उनले दाबी गरेपनि पुष्टि हुने कुनै आधार पेस गरेनन् । ‘नियमअनुसार चलन चल्ती अनुसार ब्याजमा ऋण दिने गरेको भने हो,’ उनले भने ।

जिल्ला प्रशासन कार्यालय मोरङमा मिटरब्याजका ९९८ वटा निवेदन परेका छन् । अहिलेसम्म १०३ वटा निवेदनको मात्रै सुनुवाइ भएको छ । जसमा विराटनगरका मात्रै मिटरब्याजी विरुद्धका निवेदन २ सय ८६ वटा छन् । यस्तै मोरङको सुनवर्षी, रंगेली, जहदा र ग्रामथान गाउँपालिकाका मिटरब्याजीले ठगेको निवेदनहरू पनि उल्लेख्य छन् ।

जहदा १ का सन्तोष कुमार यादवको विरुद्धमा जिल्ला प्रशासन कार्यालयमा ११ वटासम्म निवेदन छन् । विराटनगर १५ का ताराचन्द्र साह सुडीको नाममा ५ वटा निवेदन छन् । यस्तै विराटनगर ११ का जितेन्द्रकुमार यादवको नाममा ५, पथरी ९ का इन्द्रकुमार लिम्बूको नाममा ४, जहदा १ की अञ्जुदेवी यादवको नाममा ६ वटा मिटरब्याजी विरुद्धका निवेदन छन् ।

इटहरी ४ का सुमन परियारको नाममा ३ वटा, यस्तै रंगेली १ का सुधारु राजवंशीको नाममा २ वटा निवेदन छन् । विराटनगर ३ का सुदिपराज भण्डारीको नाममा २ वटा निवेदन छन् । विराटनगर ९ का सञ्जयप्रसाद रौनियारको नाममा २, विराटनगर १० का सञ्जयकुमार करवाको नाममा पनि दर्जनबढी मुद्दा छन् । जहदा ४ का मनोज सिंह कोइरीका ५ वटा निवेदन छन् । विराटनगर १८ का बब्लु यादवको २ वटा निवेदन छन् ।