वीरगञ्ज । वीरगञ्जस्थित बिआईटी इन्जिनियरिङ् कलेजमा बिहीवार बिहान विभिन्न प्रजातीका विरुवाहरू रोपिएको छ। कलेज परिसरमा आयोजित यो कार्यक्रममा भारतीय महावाणिज्य दूतावासका महावाणिज्य दूत देवी सहाय मिनाले विरुवा रोपेर कार्यक्रमको उद्घाटन गरे।

कार्यक्रममा महावाणिज्य दूत मिनाले विद्यालय, संघ-संस्था र व्यक्तिगत स्तरमा विरुवा रोप्नुपर्ने आवश्यकतामाथि जोड दिए। जलवायु परिवर्तनको संकटलाई कम गर्न विरुवा रोप्नुको विकल्प नरहेको उनले बताए। उनले भने, “प्राकृतिक सन्तुलन कायम राख्न र पृथ्वीलाई हराभरा बनाउन विरुवा रोप्नु अति आवश्यक छ।”

बिआईटी कलेजका परीक्षा प्रमुख पवन बस्नेतले कलेज परिसरमा निम, आवला, बेल, अनार, सिसी, गुल मोहर, जाकरन्दा, कदम, सखुवा, अम्बा, अर्जुन लगायतका ५० थान विरुवा रोपिएको जानकारी दिए। बस्नेतका अनुसार, विरुवाले वातावरणमा कार्बन डाइअक्साइडको अवशोषण गर्ने र आवश्यक अक्सिजनको उत्पादनमा महत्वपूर्ण भूमिका खेल्छन्।

कलेजका प्रिन्सीपल निरज श्रीवास्तवले प्राकृतिक वातावरणको सन्तुलन कायम राख्न सबैले विरुवा रोप्नुपर्ने बताए। उनले भने, “विरुवाले कार्बन डाइअक्साइडलाई अवशोषित गरेर हामीलाई अक्सिजन दिन्छन्, जसले गर्दा वातावरण स्वच्छ र हराभरा हुन्छ।”

कार्यक्रममा जनमत पार्टी पर्साका अध्यक्ष ओमप्रकाश सर्राफ, महिला नेतृ तथा समाजसेवी रम्भा मिश्रा, राजेश आर्य, पर्सा क्रिकेट एशोसिएसन संघका अध्यक्ष ई. मनिष सिंह, आरके शर्मा, सरिता जैसवाल, जयप्रकाश बिराजी, नवलकिशोर सिंह, अवधकिशोर सिंह, पवन सिंह लगायतको उपस्थिति रहेको थियो।

कार्यक्रममा सहभागीहरूले विरुवा रोप्ने महत्वमाथि चर्चा गरे र यस किसिमका गतिविधिले पर्यावरणीय संकटलाई कम गर्न सहयोग पुर्याउने विश्वास व्यक्त गरे। सबैले सामूहिक प्रयासबाट मात्रै वातावरणीय सन्तुलन कायम गर्न सकिने धारणा राखे।

कार्यक्रममा उपस्थित समाजसेवी रम्भा मिश्राले समाजमा पर्यावरणीय सचेतना बढाउन आवश्यक रहेको बताइन्। उनले भनिन्, “हामी सबैले मिलेर हाम्रा वरपरका क्षेत्रमा विरुवा रोप्नुपर्छ, यसले हाम्रो वातावरणलाई सुधार्नेछ र भावी पुस्तालाई स्वच्छ हावा र स्वस्थ वातावरण प्रदान गर्नेछ।”

कार्यक्रमको अन्त्यमा उपस्थित सबैले मिलेर विरुवाहरूको हेरचाह र संरक्षणको प्रतिबद्धता व्यक्त गरे। कलेजका विद्यार्थीहरूले पनि यो अभियानमा सक्रिय सहभागीता जनाए र भविष्यमा पनि यस किसिमका कार्यक्रमहरूमा संलग्न रहन उत्साह देखाए।

यस किसिमका अभियानहरूले स्थानीय समुदायमा हरियालीको महत्त्वबारे सचेतना फैलाउन सहयोग गर्नेछ भन्ने विश्वास कलेज प्रशासनले व्यक्त गरेको छ। कार्यक्रम सफलतापूर्वक सम्पन्न भएकोमा सबै सहभागीहरूले खुशी व्यक्त गरे।