वीरगञ्ज । सशस्त्र प्रहरीले गत आर्थिक वर्ष २०८०/८१ मा ३४ करोड बढीको अवैध सामग्री बरामद गरेको छ। सशस्त्र प्रहरी बल नेपाल नम्बर १३ गण हेडक्वाटर पर्साले १९ करोड १६ लाख ९६ हजार ९७५ रुपैयाँ बराबरको अवैध निकासी र पैठारी भएका सामान तथा सवारी साधन आवश्यक कारबाहीका लागि राजस्व अनुसन्धान कार्यालय पथलैयामा बुझाएको छ।

सशस्त्र प्रहरी बल पर्साका प्रवक्ता सशस्त्र प्रहरी नायब उपरीक्षक (डिएसपी) देबेन्द्र सिंहका अनुसार १४ करोड ८९ लाख ४८ हजार ५५६ रुपैयाँ बराबरको सामग्री वीरगञ्ज भन्सार कार्यालयमा बुझाइएको छ। डिएसपी सिंहले यात्रा डेलीलाई उपलब्ध गराएको वार्षिक प्रगति प्रतिवेदनअनुसार सशस्त्र प्रहरीले यस आर्थिक वर्षमा जम्मा ३४ करोड २७ लाख ७८ हजार ३१३ रुपैयाँ बराबरको अवैध निकासी तथा पैठारी भएका सामान तथा सवारी साधन बरामद गरेको छ।

सोही अवधिमा सशस्त्र प्रहरीले ६० लाख ३० हजार ९८५ रुपैयाँ नगद पनि बरामद गरेको छ। पर्सा जिल्लाका विभिन्न स्थानबाट एक वर्षको अवधिमा स्रोत नखुलेको रकम बरामद गरिएको डिएसपी सिंहले बताए। उनका अनुसार १४ लाख ७४ हजार ४८० रुपैयाँ भारतीय नगद पनि बरामद गरिएको छ। नगदसहित १५ जनालाई सशस्त्र प्रहरीले पक्राउ गरेको छ।

पर्साका विभिन्न स्थानबाट ४० लाख ९३ हजार ३५५ रुपैयाँ बराबरको १,५५४ क्युबिक फिट काठ पनि सशस्त्र प्रहरीले बरामद गरेको छ।

बितेको आर्थिक वर्षमा सशस्त्र प्रहरीले ठूलो परिमाणमा लागुऔषध पनि बरामद गरेको छ। एक वर्षमा २२६ किलो गाँजा, १ किलो चरेश, ९६९ पीस डाइजापाम, ८७९ पीस फेनार्गन, ९९७ पीस नुर्फिन, २४८ पीस नाइट्रोभेट, ४ दशमलव ३७ ग्राम ब्राउनसुगर, र १५ हजार २६ पीस ट्रमाडोलसहितका प्रतिबन्धित औषधीहरू बरामद गरेको डिएसपी सिंहले जानकारी दिए।

सशस्त्र प्रहरीले गत वर्षको साउन १ गतेदेखि यस वर्षको असार ३१ गतेसम्म ७९ जनालाई पक्राउ गरेको छ। अवैध काठसहित तीन जनालाई, बालुवा/ट्याक्टरसहित एक जनालाई, मानव तस्करी तथा ओसारपसारमा संलग्न १५ जनालाई, अवैध निकासी तथा पैठारीका सामानसहित १९ जनालाई र लागुऔषधसहित २६ जनालाई पक्राउ गरिएको सशस्त्र प्रहरी नायब उपरीक्षक सिंहले बताए।

पर्सा जिल्लाका विभिन्न स्थानमा रहेका सशस्त्र प्रहरी युनिट तथा गुल्महरूको सक्रियता प्रमुख सशस्त्र प्रहरी उपरीक्षक राधेश्याम धिमालले प्रशंसा गरेका छन्। सीमा सुरक्षासँगै राजस्व चुहावट नियन्त्रणका लागि सशस्त्र प्रहरीले सक्रियपूर्वक काम गरिरहेको उनको भनाइ छ। खुला सीमानाले केही चुनौती थपिए पनि सिमित स्रोत साधन र अपर्याप्त जनशक्तिका बाबजुद राम्रो प्रतिफल आउने गरी काम भइरहेको उनको प्रतिक्रिया छ।